काठमाडौं । नेपाली कांग्रेसका उपसभापति विश्वप्रकाश शर्माले पार्टी सभापति र केन्द्रीय समितिको वैधानिकताका विषयमा कुनै अलमल नरहेको बताएका छन्।

शनिबार ललितपुरमा फुटसल प्रतियोगितामा सहभागी हुन पुगेका शर्माले विधिपूर्वक सम्पन्न भएको विशेष महाधिवेशनलाई निर्वाचन आयोग र अदालतले समेत मान्यता दिएको अवस्थामा यस विषयमा विवाद गर्न आवश्यक नरहेको बताएका हुन्।

उनले सर्वोच्च अदालतको फैसला सबैले स्वीकार गर्नुपर्नेमा जोड दिए। अदालतले पार्टीको केन्द्रीय समिति बदर नगरेको र गगन थापा नै सभापति रहेको स्पष्ट भइसकेको उनको भनाइ छ।

शर्माले संस्थापन इतर समूहलाई विधिभित्र रहेर राजनीति गर्न आग्रह गरे।

‘आवेगमा आएर यता नेमप्लेट राख्ने, उता राख्ने, उहाँ पनि सभापति हुनुहुन्छ, उहाँ पनि कार्यसमिति नै हो, उहाँ नै पदाधिकारी हुनुहुन्छ भन्ने कुरा भनेको खेलको नियम, विधिभन्दा बाहिरको कुरा हुन्छ,’ उनले भने, ‘हामी आग्रह गर्छौं– विधिभित्र जसरी खेल चल्छ, त्यसरी नै विधिभित्र राजनीति चल्नुपर्छ।’

पार्टी फुट्ने आशंका अस्वीकार

शर्माले कांग्रेसमा पार्टी फुट्ने अवस्था नरहेको दाबी गर्दै विधिको सर्वोच्चता कायम रहने बताए।

उनले फुटसलको उदाहरण दिँदै खेलमा पहेँलो वा रातो कार्ड देखाउने अधिकार दर्शकलाई नभई रेफ्रीलाई मात्र हुने बताए। त्यसैगरी राजनीतिमा पनि आधिकारिक निर्णय गर्ने अधिकार निर्वाचन आयोग र सर्वोच्च अदालतजस्ता सम्बन्धित निकायलाई मात्र हुने उनको तर्क थियो।

सर्वोच्च अदालतले कांग्रेसको केन्द्रीय समिति बदर नगरेको र सभापति गगन थापा नै कायम रहेको भन्दै शर्माले संस्थापन इतर समूहलाई आवेगभन्दा पनि विधि र संस्थागत प्रक्रियाअनुसार अघि बढ्न आग्रह गरे।

Originally published on abcnews.com.np.