पोखरा । अविरल वर्षाका कारण पहिरो खस्दा पोखरा–बागलुङ सडकखण्डअन्तर्गत मध्यपहाडी लोकमार्गको कास्की खण्ड पूर्णरूपमा अवरुद्ध भएको छ।

प्रहरीका अनुसार अन्नपूर्ण गाउँपालिका–३ स्थित कृषि अनुसन्धान केन्द्र लुम्लेको ३ नम्बर गेट नजिकै पहिरो खसेपछि सडकमा यातायात ठप्प भएको हो।

लगातार वर्षाका कारण घान्द्रुक जाने सडक पनि विभिन्न स्थानमा पहिरो खसेर अवरुद्ध भएको प्रहरीले जनाएको छ। सडक अवरुद्ध भएपछि यात्रु तथा स्थानीयको आवतजावत प्रभावित भएको छ।

बाढीले झिनु तातोपानीमा ठूलो क्षति

मोदीखोलामा आएको बाढीले कास्कीको झिनु तातोपानी क्षेत्रमा समेत ठूलो क्षति पुर्‍याएको छ।

प्रहरीका अनुसार बाढीले आफ्नो प्राकृतिक बहाव परिवर्तन गर्दै तातोपानी कुण्डसम्मै पुगेको छ। बाढीका कारण तातोपानी क्षेत्र प्रभावित हुनुका साथै तातोपानी मूलसम्म पुग्ने अवस्था नरहेको बताइएको छ।

लगातार वर्षाका कारण पहिरो तथा बाढीको जोखिम बढेकाले प्रभावित क्षेत्रमा आवश्यक सावधानी अपनाउन स्थानीयवासी तथा यात्रुलाई आग्रह गरिएको छ।

Originally published on abcnews.com.np.