हेटौँडा । बागमती प्रदेशका मुख्यमन्त्री इन्द्रबहादुर बानियाँले आगामी भदौ १ गते विश्वासको मत लिने भएका छन्।

नेकपा (एमाले)ले सरकारलाई दिएको समर्थन फिर्ता लिएपछि अल्पमतमा परेका मुख्यमन्त्री बानियाँले भदौ १ गते दिउँसो १ बजे प्रदेश सभाबाट विश्वासको मत लिन लागेका हुन्।

एमालेले गत साउन ६ गते सरकारलाई दिएको समर्थन फिर्ता लिएपछि बानियाँ नेतृत्वको सरकार अल्पमतमा परेको थियो। मुख्यमन्त्री बानियाँले प्रदेश सभा सचिवालयलाई पत्राचार गरेपछि भदौ १ गतेका लागि प्रदेश सभा बैठक बोलाइएको हो।

५३ मत आवश्यक

१०४ सदस्यीय बागमती प्रदेश सभामा सरकार जोगाउन ५३ सांसदको समर्थन आवश्यक पर्छ।

प्रदेश सभामा नेपाली कांग्रेसका ३६, नेकपाका २६, एमालेका २५, राष्ट्रिय प्रजातन्त्र पार्टी (राप्रपा)का १२, नेपाल मजदुर किसान पार्टी (नेमकिपा)का ३ र हाम्रो नेपाली पार्टीका २ सांसद छन्।

हाल मुख्यमन्त्री बानियाँको पक्षमा कांग्रेसका ३६ र हाम्रो नेपाली पार्टीका २ गरी ३८ सांसदको समर्थन देखिन्छ। बहुमतका लागि थप १५ सांसद आवश्यक पर्नेछ।

बहुमत जुटाउन मुख्यमन्त्री बानियाँले राप्रपाका १२ र नेमकिपाका ३ सांसदको समर्थन लिने प्रयास गरिरहेका छन्।

राप्रपा अझै अनिर्णीत

राप्रपाले भने प्रदेश सरकार गठनको अंकगणितमा तत्काल सहभागी नहुने संकेत गरेको छ। राप्रपाले आफ्नो समर्थनबारे औपचारिक निर्णय नगरेकाले मुख्यमन्त्री बानियाँलाई विश्वासको मत जुटाउन थप चुनौती देखिएको छ।

मुख्यमन्त्री बानियाँले विश्वासको मत प्राप्त गर्न नसके बागमती प्रदेशमा नयाँ सरकार गठनको प्रक्रिया अघि बढ्नेछ। त्यसैले भदौ १ गते हुने मतदानलाई प्रदेश सरकारको भविष्य निर्धारण गर्ने महत्वपूर्ण राजनीतिक घटनाका रूपमा हेरिएको छ।

Originally published on abcnews.com.np.