काठमाडौं, ३० साउन । नेपाली कांग्रेसकी केन्द्रीय सदस्य सुजाता कोइरालाले सभापति गगन थापाको नेतृत्वप्रति आफू विश्वस्त बनेको बताएकी छन्।

सानेपामा जारी कांग्रेस केन्द्रीय समिति बैठकमा बोल्दै कोइरालाले सुरुवातमा युवा उमेरका थापाले पार्टी कसरी सञ्चालन गर्लान् भन्ने चिन्ता रहे पनि अहिले उनको नेतृत्वमा कांग्रेसले गति लिन थालेको बताइन्।

कोइराला परिवारका अन्य सदस्यहरू इतरपक्षको राष्ट्रिय भेलामा सहभागी भइरहेका बेला सुजाताले भने सानेपाबाटै गगन थापालाई सभापतिका रूपमा स्वीकार गरेर पार्टी एकताबद्ध हुन आग्रह गरिन्।

‘एकता गर्ने हो भने दुवै पक्षले केही न केही गिभ इन गर्नुपर्छ। गगन थापालाई मैले सोचेको थिइनँ, उहाँले यति राम्ररी कांग्रेसलाई हाँकेर ट्रयाकमा लग्नुहुन्छ,’ उनले भनिन्।

थापामा पार्टीलाई अघि बढाउने क्षमता र हिम्मत रहेको भन्दै उनले अन्य पदाधिकारीले समेत साथ दिएकोमा प्रशंसा गरिन्।

‘एक युवाले कसरी यो पार्टीलाई सम्हाल्न सक्ला भन्ने चिन्ता लाग्थ्यो, तर कांग्रेस छाड्दिनँ भन्ने लागेको थियो। अहिले मलाई गगन थापाजीमाथि विश्वास भयो। उहाँले यो पार्टी हाँकेर लैजानुहुन्छ, पार्टीलाई अगाडि बढाउन सक्ने ताकत उहाँमा रहेछ,’ कोइरालाले भनिन्।

उनले पार्टीका पदाधिकारीहरूले सभापति थापालाई सहयोग गरेर कांग्रेसलाई बलियो बनाउने काम गरिरहेको भन्दै प्रशंसा गरिन्।

‘कांग्रेसमा ठूलो षड्यन्त्र भइरहेको छ’

कोइरालाले कांग्रेसलाई कमजोर बनाउने प्रयास भइरहेको भन्दै पार्टीभित्र एकता आवश्यक रहेको बताइन्।

आगामी संघीय तथा स्थानीय निर्वाचनमा कांग्रेसको प्रतिनिधित्व बलियो बनाउन पार्टी एकताबद्ध भएर अघि बढ्नुपर्ने उनको भनाइ छ।

‘पार्टीको एकता हुनुपर्छ, चुनावहरू आइरहेका छन्, जितेर ल्याउनु छ। संघीय चुनाव छ, स्थानीय चुनाव छ, त्यसमा हाम्रो प्रतिनिधित्व एकदम बलियो हुनुपर्छ,’ उनले भनिन्।

एकताको नाममा एउटा पक्षले मात्रै सबै कुरा त्याग्दै जाने र अर्को पक्षले दम्भ तथा अहंकार राख्ने अवस्था स्वीकार्य नहुने उनले बताइन्। सभापति थापा पार्टी एकताका लागि धेरै लचिलो बनेको उनको दाबी छ।

‘पाँच वर्षमा पहिलो पार्टी बन्न सक्छ’

कोइरालाले कांग्रेसप्रति युवाको आकर्षण बढिरहेको भन्दै आगामी पाँच वर्षमा कांग्रेसलाई पहिलो पार्टी बनाउन सकिने दाबी गरिन्।

‘डराउनुपर्ने, तर्सनुपर्ने केही छैन। पार्टीले गति लिँदै छ, राम्रो बाटोमा जाँदै छ। मैले बुझेअनुसार पार्टीमा युवाहरू आकर्षित हुँदै गइरहेका छन्। पाँच वर्षमा पहिलो पार्टी बन्न सक्छ,’ उनले भनिन्।

इतरपक्षलाई जिद्दी र अहंकार त्यागेर सभापति थापालाई स्वीकार गर्दै एकजुट हुन आग्रह गर्दै उनले पुराना नेताहरूले अभिभावकको भूमिका निर्वाह गर्नुपर्ने बताइन्।

Originally published on abcnews.com.np.