काठमाडौं । संसदीय समितिका बैठकमा सांसदहरूको अभिव्यक्ति र व्यवहार अमर्यादित हुँदै गएको भन्दै प्रतिनिधिसभाअन्तर्गतको कानुन, न्याय तथा मानव अधिकार समितिकी सभापति समीक्षा बास्कोटाले सांसदहरूलाई मर्यादित भाषा प्रयोग गर्न निर्देशन दिएकी छन्।

समितिको आजको बैठकमा सभापति बास्कोटाले समितिमा आमन्त्रित व्यक्तिहरू राज्यका महत्वपूर्ण जिम्मेवारीमा रहेकाले उनीहरूसँग प्रश्न गर्दा तथा धारणा राख्दा सांसदहरूले आफ्नो भाषा र शैलीप्रति सचेत हुनुपर्ने बताइन्।

उनले सम्बन्धित विषयमा केन्द्रित भएर बोल्न तथा भाषाशैलीमा संवेदनशील र मर्यादित हुन सांसदहरूलाई आग्रह गरिन्।

सभापति बास्कोटाको यो निर्देशन समितिमा सत्तापक्षका सांसदहरूले समेत प्रश्न सोध्ने क्रममा कडा तथा अमर्यादित शैली प्रयोग गरेको भन्दै त्यसलाई नियन्त्रण गर्न आवश्यक देखिएपछि आएको बताइएको छ।

कैदीबन्दीको मानव अधिकारबारे छलफल

कानुन, न्याय तथा मानव अधिकार समितिको आजको बैठकमा देशभरका हिरासत तथा कारागारमा रहेका कैदीबन्दीको मानव अधिकारको अवस्थाबारे छलफल भइरहेको छ।

बैठकमा कानुनमन्त्री सोबिता गौतम, गृहमन्त्री सुधन गुरुङ, नेपाल प्रहरीका महानिरीक्षक दानबहादुर कार्कीलगायत गृह मन्त्रालय तथा सुरक्षा निकायका अधिकारीहरू सहभागी छन्।

कानुनमन्त्री गौतमले कैदीबन्दीको मानव अधिकारको विषयमा सरकार गम्भीर रहेको बताइन्। गृहमन्त्री गुरुङले कारागार तथा हिरासतमा रहेका कैदीबन्दीको अवस्था सुधारका लागि आवश्यक कदम चालिने प्रतिबद्धता जनाएका छन्।

Originally published on abcnews.com.np.