काठमाडौं । नेपाली कांग्रेसका नेता उमाकान्त चौधरीले पार्टी सभापति गगनकुमार थापा बीपी कोइरालाको सिद्धान्त र विचारबाट विचलित हुँदै गएको आरोप लगाएका छन्।

कांग्रेस संस्थापनइतर पक्षको राष्ट्रिय भेलालाई सम्बोधन गर्दै पूर्वसहमहामन्त्रीसमेत रहेका चौधरीले थापाले ‘सामाजिक लोकतन्त्र’को अवधारणा अघि सार्नु नै कांग्रेसको मूल विचारबाट विचलन भएको दाबी गरे।

उनले भने, “महामानव बीपीको आदर्श, सिद्धान्त र विचारबाट गगन थापा विचलित हुँदै गएको देखियो।”

चौधरीका अनुसार बीपी कोइरालाले अघि सारेको राष्ट्रियता, लोकतन्त्र र समाजवाद कांग्रेसको मूल आदर्श भएको भन्दै त्यसबाट बाहिर गएर सामाजिक लोकतन्त्रको कुरा गर्नु उपयुक्त नभएको उनको तर्क छ।

उनले भने, “बीपी कोइरालाका राष्ट्रियता, लोकतन्त्र र समाजवादबाट विचलित भएर सामाजिक लोकतन्त्र भन्न थाल्नुभएको छ, यो भन्नु नै उहाँ विचलित हुनु हो।”

चौधरीले नयाँ पुस्तालाई कांग्रेसको आदर्शबारे भ्रम सिर्जना गर्ने काम भइरहेको आरोप लगाउँदै त्यस्तो विचार कांग्रेसले स्वीकार गर्न नसक्ने बताए।

सर्वोच्चबाट न्याय पाउने दाबी

पार्टीभित्रको विवादसँग सम्बन्धित विषयमा आफूहरूले सर्वोच्च अदालतबाट न्याय पाउने विश्वाससमेत चौधरीले व्यक्त गरे। उनले पार्टीको विचार, सिद्धान्त र विधानअनुसार अघि बढ्नुपर्नेमा जोड दिए।

Originally published on abcnews.com.np.