काठमाडौं । नेपाली कांग्रेसका संस्थापनइतर पक्षका नेता प्रकाशशरण महतले पार्टी एकता अपरिहार्य रहेको बताएका छन्।
शुक्रबार काठमाडौंमा आयोजित राष्ट्रिय भेलालाई सम्बोधन गर्दै महतले विगतका मतभेद र विवादलाई बिर्सिएर पार्टी एकताका लागि तत्काल पहल गर्नुपर्ने बताएका हुन्।
उनले पार्टीभित्र समझदारी कायम गर्न अधिकार सम्पन्न ‘स्टेरिङ कमिटी’ गठन गर्नुपर्ने प्रस्तावसमेत अघि सारे।
“समझदारीको बटमलाइन सजिलो थियो । अधिकार सम्पन्न स्टेरिङ कमिटी बनाऔँ,” महतले भने।
‘आत्मासहितको कांग्रेस आवश्यक’
महतले नेपाली कांग्रेसको आधिकारिकता कायम रहे पनि पार्टीभित्रको आत्मा कमजोर भएको टिप्पणी गरे।
उनका अनुसार अहिले कांग्रेससँग संगठनको ‘शरीर’ भए पनि त्यसमा आवश्यक राजनीतिक आत्मा नरहेको अवस्था छ। त्यसैले पार्टीलाई आत्मासहित पुनः एकताबद्ध बनाउनु आवश्यक रहेको उनले बताए।
“आत्मासहितको नेपाली कांग्रेस अहिलेको आवश्यकता हो,” महतले भने।
उनले पार्टीभित्रको विवाद र मतभेदलाई थप चर्काउनेभन्दा समाधान खोज्दै एकताका लागि सबै पक्ष अघि बढ्नुपर्नेमा जोड दिए।
तत्काल पहल गर्न आग्रह
महतले कांग्रेसभित्रको वर्तमान परिस्थितिलाई लामो समयसम्म कायम राख्न नहुने भन्दै पार्टी एकताका लागि तत्काल पहल आवश्यक रहेको बताए।
उनले विगतका घटनालाई लिएर एकअर्कालाई दोष दिनेभन्दा संवाद, समझदारी र सहकार्यका माध्यमबाट पार्टीलाई पुनः एकताबद्ध बनाउनुपर्ने धारणा राखे।
Originally published on abcnews.com.np.
प्रतिक्रिया दिनुहोस्