काठमाडौं । नेपाली कांग्रेसका नेता कृष्णप्रसाद सिटौलाले निर्वाचन आयोगले गगन थापा नेतृत्वको कार्यसमितिलाई ‘लहडमा’ आधिकारिकता दिएको आरोप लगाएका छन्।

शुक्रबार इतरपक्षको राष्ट्रिय भेलालाई सम्बोधन गर्दै सिटौलाले आधिकारिकता दिने निर्वाचन आयोगका आयुक्तको भूमिकामाथि समेत प्रश्न उठाए। उनले विशेष महाधिवेशनबाट बनेको कार्यसमितिलाई आफूहरूले वैधानिक नमान्ने बताए।

सिटौलाले गगन थापालाई सभापति भन्नसमेत आफूलाई मन नलागेको टिप्पणी गरे। “गगन भाइलाई सभापति भन्न मनै लागेको छैन। विशेष महाधिवेशनलाई मान्यता दिन सकिएको छैन। अराजक ढङ्गबाट गरिएको छ। यो कुनै व्यक्तिगत पूर्वाग्रह होइन, विधानविपरीत कार्य भएको छ,” उनले भने।

उनले पार्टी विधान र प्रक्रियाअनुसार अघि बढ्नुपर्ने भन्दै भएका गल्ती सच्याएर पार्टीलाई अगाडि बढाउन सुझाव दिए।

सर्वोच्चबाट न्याय पाउने विश्वास

सर्वोच्च अदालतले पुनरावलोकनका लागि निस्सा दिएपछि आफूहरूको पक्षमा न्याय हुने विश्वास बढेको सिटौलाले बताए।

विशेष महाधिवेशनको वैधानिकता र त्यसबाट बनेको कार्यसमितिको आधिकारिकताबारे विवाद भइरहेका बेला सर्वोच्चमा पुनरावलोकनको प्रक्रिया अघि बढेको छ। सिटौलाले अदालतको अन्तिम निर्णयपछि पार्टीभित्रको विवाद समाधान हुने विश्वास व्यक्त गरे।

उनले कांग्रेसलाई विधान र लोकतान्त्रिक प्रक्रियाअनुसार अघि बढाउनुपर्नेमा जोड दिँदै व्यक्तिगत पूर्वाग्रहभन्दा पार्टीको संस्थागत हितलाई प्राथमिकता दिनुपर्ने बताए।

Originally published on abcnews.com.np.