काठमाडौं । नेपाली कांग्रेसका नेता विमलेन्द्र निधिले पार्टीको १५औँ महाधिवेशन आयोजना गर्ने वैधानिक अधिकार १४औँ महाधिवेशनबाट निर्वाचित कार्यसमितिमै रहेको दाबी गरेका छन्।

संस्थापनइतर समूहले शुक्रबार आयोजना गरेको राष्ट्रिय भेलालाई सम्बोधन गर्दै निधिले विशेष महाधिवेशनबाट बनेको गगन थापा नेतृत्वको कार्यसमितिलाई आगामी महाधिवेशन आयोजना गर्ने अधिकार पार्टी विधानले नदिएको जिकिर गरे।

उनले पार्टीको आधिकारिक सभापति अझै पनि शेरबहादुर देउवा नै रहेको दाबी गर्दै १४औँ महाधिवेशनबाट निर्वाचित कार्यसमितिको निरन्तरतालाई अस्वीकार गरेर अर्को संरचनाबाट महाधिवेशन आयोजना गर्न खोज्नु विधानसम्मत नहुने बताए।

“१४औँ महाधिवेशनको कार्यसमितिले नै १५औँ महाधिवेशन गर्ने हो। अराजक, अवैध रूपमा कब्जा गरेर आएको कमिटीलाई १५औँ महाधिवेशन गर्ने अधिकार विधानले दिएको छैन,” निधिले भने।

विशेष महाधिवेशनमाथि प्रश्न

निधिको अभिव्यक्ति कांग्रेसभित्र विशेष महाधिवेशनपछि उत्पन्न भएको वैधानिकता विवादसँग प्रत्यक्ष जोडिएको छ। विशेष महाधिवेशनबाट गगन थापाको नेतृत्वमा नयाँ कार्यसमिति गठन भएको दाबी गरिँदै आएको छ भने देउवा पक्षले त्यसलाई पार्टी विधानविपरीत भन्दै आएको छ।

निधिले १४औँ महाधिवेशनबाट निर्वाचित कार्यसमितिलाई नै पार्टीको वैधानिक निरन्तरता मानिनुपर्ने धारणा राख्दै आगामी महाधिवेशनलाई निष्पक्ष र विधिसम्मत रूपमा सम्पन्न गर्ने आधार राष्ट्रिय भेलाले तय गर्ने बताए।

देउवा नै आधिकारिक सभापति भएको दाबी

निधिले कांग्रेसको आधिकारिक सभापति शेरबहादुर देउवा नै रहेको दोहोर्‍याए। उनका अनुसार पार्टीको नियमित महाधिवेशनबाट निर्वाचित नेतृत्वलाई हटाएर विशेष प्रक्रियाबाट गठन भएको संरचनालाई वैधानिक मान्यता दिनु पार्टीको विधान र स्थापित प्रक्रियासँग मेल खाँदैन।

कांग्रेसभित्र विशेष महाधिवेशन, निर्वाचन आयोगको निर्णय र त्यससँग सम्बन्धित न्यायिक प्रक्रियाका कारण नेतृत्व तथा पार्टीको आधिकारिकताबारे विवाद चर्किएको छ। संस्थापनइतर समूहको राष्ट्रिय भेलामा अधिकांश नेताले १४औँ महाधिवेशनबाट निर्वाचित कार्यसमितिको वैधानिकता कायम गर्दै १५औँ महाधिवेशनको बाटो खोल्नुपर्ने धारणा राखेका छन्।

निधिले पनि यही विषयलाई केन्द्रमा राख्दै पार्टीको महाधिवेशन व्यक्तिको इच्छा वा समूहगत निर्णयका आधारमा नभई विधान र स्थापित लोकतान्त्रिक प्रक्रियाअनुसार हुनुपर्नेमा जोड दिएका छन्।

Originally published on abcnews.com.np.