हेटौँडा । बागमती प्रदेश सरकारले मन्त्रालय गाभिएपछि प्रदेश सचिवहरूको क्षेत्रगत जिम्मेवारी तोकेको छ। शुक्रबार बसेको प्रदेश मन्त्रिपरिषद् बैठकले गाभिएका मन्त्रालयको संगठन तथा व्यवस्थापन सर्वेक्षण सम्पन्न नभएसम्मका लागि प्रदेश सचिवलाई विभिन्न क्षेत्रको जिम्मेवारी दिने निर्णय गरेको हो।

प्रदेश सरकारका प्रवक्ता एवं आर्थिक मामिला तथा योजनामन्त्री प्रभात तामाङका अनुसार आन्तरिक मामिला, कानुन तथा सहकारी मन्त्रालयको जिम्मेवारी महेश भट्टराईलाई दिइएको छ।

उद्योग, वाणिज्य, पर्यटन, श्रम तथा यातायात मन्त्रालयअन्तर्गत जीवलाल भुसाललाई उद्योग तथा वाणिज्य, अनिता निरौलालाई श्रम तथा यातायात र दीपेन्द्र सुवेदीलाई संस्कृति तथा पर्यटन क्षेत्रको जिम्मेवारी तोकिएको छ।

त्यस्तै, स्वास्थ्य तथा सामाजिक विकास मन्त्रालयअन्तर्गत गीताकुमारी होमेगाईंलाई युवा तथा खेलकुद, डा. सुमित्रा गौतमलाई स्वास्थ्य र खुबिराम अधिकारीलाई सामाजिक क्षेत्रको जिम्मेवारी दिइएको छ।

कृषि, पशुपन्छी, वन तथा वातावरण मन्त्रालयअन्तर्गत डा. केदार बराललाई वन तथा वातावरण र सुधिर श्रेष्ठलाई कृषि तथा पशुपन्छी क्षेत्रको जिम्मेवारी दिइएको प्रवक्ता तामाङले जानकारी दिए।

संगठन तथा व्यवस्थापन सर्वेक्षणसम्म जिम्मेवारी

प्रदेश सरकारले मन्त्रालय गाभिएपछि नयाँ संरचनाअनुसार संगठन तथा व्यवस्थापन सर्वेक्षणको काम अघि बढाउने भएको छ। प्रवक्ता तामाङका अनुसार उक्त सर्वेक्षण सम्पन्न नभएसम्म प्रदेश सचिवहरूले तोकिएको क्षेत्रको जिम्मेवारी सम्हाल्नेछन्।

Originally published on abcnews.com.np.