काठमाडौँ । एभरेस्ट वुमन्स भलिबल लिग (ईडब्लूभी)को तेस्रो संस्करण आगामी असोज तेस्रो साता आयोजना हुने भएको छ। ईडब्लूभीले शनिबार प्रतियोगिताको मिति सार्वजनिक गरेको हो।

आयोजकका अनुसार प्रतियोगिता असोज १५ देखि २४ गतेसम्म काठमाडौंको दशरथ रंगशाला कभर्ड हलमा सञ्चालन हुनेछ। नेपाल भलिबल संघले पनि प्रतियोगिताको मितिलाई स्वीकृति दिइसकेको छ।

अघिल्ला दुई संस्करणको सफलता र बढ्दो लोकप्रियतासँगै तेस्रो संस्करणलाई थप भव्य, प्रतिस्पर्धात्मक र व्यवस्थित बनाउने तयारी भइरहेको ईडब्लूभीले जनाएको छ।

लिगले महिला भलिबल खेलाडीलाई उच्चस्तरीय प्रतिस्पर्धाको अवसर प्रदान गर्दै आएको छ। तेस्रो संस्करणले नेपालमा महिला भलिबलको विकास, विस्तार र खेलाडीको क्षमता अभिवृद्धिमा थप योगदान पुर्‍याउने अपेक्षा गरिएको छ।

महिला भलिबलको विकासमा जोड

ईडब्लूभीका अनुसार प्रतियोगिताको मुख्य उद्देश्य महिला भलिबल खेलाडीलाई राष्ट्रियस्तरको प्रतिस्पर्धात्मक वातावरण उपलब्ध गराउनु हो। साथै, नेपालमा महिला भलिबलको विकास र विस्तारसँगै खेलप्रति आकर्षण बढाउनु पनि लिगको लक्ष्य रहेको छ।

Originally published on abcnews.com.np.