रूपन्देही । राप्ती स्वास्थ्य विज्ञान प्रतिष्ठान, घोराहीमा ‘उपकुलपति (भीसी) कप फुटसल प्रतियोगिता–२०८३’ शनिबारदेखि सुरु भएको छ।

प्रतिष्ठानमा कार्यरत चिकित्सक, कर्मचारी, विद्यार्थी तथा आबद्ध विभिन्न पक्षबीच आपसी सद्भाव, सहकार्य र स्वस्थ प्रतिस्पर्धाको भावना विकास गर्ने उद्देश्यले प्रतियोगिता आयोजना गरिएको हो।

प्रतिष्ठानको आयोजनामा सञ्चालित प्रतियोगिता दुई दिनसम्म चल्नेछ। घोराहीको भरतपुर रोड नजिकै रहेको पुरानो हाउस फुटसल मैदानमा भइरहेको प्रतियोगितामा चिकित्सक, विद्यार्थी र कर्मचारी गरी १० वटा टोली सहभागी छन्।

प्रतियोगिताको उद्घाटन प्रतिष्ठानका निमित्त कार्यालय प्रमुख तथा अस्पताल निर्देशक सहप्राध्यापक डा. सुरेश रसाइलीले गरेका हुन्।

उद्घाटन कार्यक्रममा बोल्दै डा. रसाइलीले व्यस्त कार्यतालिकाबीच खेलकुदले चिकित्सक, कर्मचारी तथा विद्यार्थीको शारीरिक र मानसिक स्वास्थ्यसँगै आपसी सम्बन्ध मजबुत बनाउन सहयोग गर्ने बताए।

उनले प्रतिष्ठानमा कार्यरत जनशक्तिबीच आपसी परिचय, सहकार्य र टीम भावना विकास गर्न यस्ता गतिविधिले महत्वपूर्ण भूमिका खेल्ने भन्दै प्रतियोगितालाई आगामी दिनमा पनि निरन्तरता दिनुपर्नेमा जोड दिए।

भोलिसम्म सञ्चालन हुने

प्रतियोगितामा सहभागी टोलीबीच प्रतिस्पर्धा भइरहेको छ। फुटसलले प्रतिष्ठानमा कार्यरत चिकित्सक, कर्मचारी र विद्यार्थीबीच खेलकुदप्रतिको रुचि बढाउनुका साथै कार्यस्थलमा सकारात्मक वातावरण निर्माण गर्न सहयोग पुग्ने अपेक्षा गरिएको छ।

आयोजकका अनुसार प्रतियोगिता आइतबारसम्म सञ्चालन हुनेछ। उत्कृष्ट प्रदर्शन गर्ने टोली तथा खेलाडीलाई उपकुलपति प्राडा अजयकुमार मिश्रले पुरस्कार तथा सम्मान प्रदान गर्नेछन्।

Originally published on abcnews.com.np.