काठमाडौँ । नेपाली कांग्रेसका नेता डा. शशांक कोइरालाले आगामी १५औँ महाधिवेशनमा पार्टी सभापतिका लागि आफू इच्छुक रहेको बताएका छन्। तर, डा. शेखर कोइराला सभापतिमा उम्मेदवारी दिए आफूले सहयोग गर्ने उनको भनाइ छ।

काठमाडौँको सुकेधारास्थित मिराकल पार्टी प्यालेसमा जारी कांग्रेस संस्थापन इतर समूहको राष्ट्रिय भेलामा सञ्चारकर्मीसँग कुरा गर्दै डा. शशांकले सभापतिका लागि आफू तयार रहेको बताएका हुन्।

‘पार्टी सभापतिका लागि पनि इच्छुक त छु, तर मैले इच्छा मात्रै गरेर भएन। पार्टीका साथीहरूको के भनाइ छ, पहिले त्यो सुन्नुपर्‍यो। अनि निर्णय गर्छु,’ उनले भने।

उनले आगामी १५औँ महाधिवेशनबाट कांग्रेसमा नयाँ नेतृत्व आउने बताए। यद्यपि, महाधिवेशन शेरबहादुर देउवाकै नेतृत्वमा आयोजना हुने सम्भावना रहेको उनको भनाइ थियो।

‘शेखर उठ्नुभयो भने सहयोग गर्छु’

सभापतिका लागि डा. शेखर कोइरालाले पनि उम्मेदवारी दिन सक्ने सम्भावनाबारे सोधिएको प्रश्नमा शशांकले आफूहरूबीच राम्रो समझदारी रहेको बताए।

‘हाम्रोबीचमा धेरै राम्रो समझदारी छ। उहाँ उठ्नुभयो भने ठीकै छ, म सहयोग गरिहाल्छु,’ उनले भने।

यस अभिव्यक्तिले कोइराला परिवारभित्र आगामी महाधिवेशनको नेतृत्वलाई लिएर सहकार्यको सम्भावना रहेको संकेत गरेको छ। शशांक स्वयं सभापतिका लागि इच्छुक देखिए पनि शेखर उम्मेदवार बने आफू उनको पक्षमा उभिने स्पष्ट सन्देश दिएका छन्।

‘पार्टी विभाजनको पक्षमा छैन’

डा. शशांकले आफू कांग्रेस विभाजनको पक्षमा नरहेको स्पष्ट पारे। पार्टीभित्रको विवादलाई थप चर्काउनेभन्दा कांग्रेसलाई एकीकृत बनाएर अघि बढाउनुपर्ने उनको धारणा छ।

उनले जारी राष्ट्रिय भेलाले कांग्रेसलाई नयाँ ढंगबाट अघि बढाउन आधार तयार गर्ने विश्वास व्यक्त गरे।

‘नयाँ कांग्रेस, संगठित कांग्रेस, नयाँ दिशातर्फ जान्छ कांग्रेस,’ उनले भने।

अब विकासलाई प्राथमिकता दिनुपर्छ

कांग्रेसले अब सैद्धान्तिक बहसमा मात्र अल्झिनुभन्दा देशको विकास र आर्थिक समृद्धिलाई प्राथमिकतामा राख्नुपर्ने शशांकको धारणा छ।

उनका अनुसार कांग्रेस मात्रै होइन, देशका सबै राजनीतिक दलले विकासलाई राजनीतिको केन्द्रमा राखेर अघि बढ्नुपर्ने आवश्यकता छ। राजनीतिक विवाद र नेतृत्वको प्रतिस्पर्धाभन्दा जनताका दैनिक समस्या समाधान र विकासका एजेन्डालाई प्राथमिकता दिनुपर्ने उनको जोड थियो।

कांग्रेस संस्थापन इतर समूहको राष्ट्रिय भेलामा अहिले विभिन्न नेताहरूले प्रस्तुत गरेका राजनीतिक, आर्थिक–सामाजिक तथा समसामयिक विषयका दस्तावेजमाथि समूहगत छलफल भइरहेको छ। शुक्रबारदेखि सुरु भएको भेला आइतबारसम्म चल्नेछ।

Originally published on abcnews.com.np.