बागलुङ । लोकभाकाका दर्जनौँ चर्चित गीतमार्फत लोकप्रियता कमाएका गायक प्रकाश दुतराज अब समूह ब्याण्डसहित दर्शकमाझ आउने भएका छन्। उनले पञ्चेबाजा, लोक तथा सांस्कृतिक बाजासहितको ब्याण्ड बनाएर नयाँ अभ्यास सुरु गर्न लागेका हुन्।

दुतराजका अनुसार भदौ १२ गते आफ्नै जन्म जिल्ला म्याग्दीबाट यो अभियान सुरु हुनेछ। त्यसपछि ब्याण्डसहित देशका विभिन्न स्थानमा पुग्ने उनको योजना छ। आधुनिक तथा पप गीतका गायकहरू ब्याण्डका रूपमा प्रस्तुत हुँदै आए पनि लोकभाकालाई केन्द्रमा राखेर ब्याण्ड निर्माण गर्नु नयाँ अभ्यास भएको उनले बताए।

‘यो नयाँ अभ्यास पनि हो, काम गर्दै सिक्दै जानेछु,’ दुतराजले भने, ‘पहिलो अभ्यास आफ्नै जिल्लाबाट थाल्न लागेको छु।’

उनले अभियानका लागि ३५ जनाको समूह तयार पारेका छन्। यसअघि मेला तथा महोत्सवमा एकल रूपमा प्रस्तुति दिँदै आएका दुतराज अब समूहमा सांगीतिक प्रस्तुति दिने तयारीमा छन्। पहिलो चरणमा निःशुल्क कार्यक्रम गर्दै अभियान अघि बढाउने उनको योजना छ। म्याग्दी उद्योग वाणिज्य संघलगायत स्थानीय संस्थाले अभियानमा सहयोग गरेका छन्।

मौलिक बाजासहित प्रस्तुति

‘रिमै’, ‘जाम भो माइली’, ‘घर कता हो बैनीको’, ‘करिमा’ र ‘मनमाया’लगायत गीतबाट चर्चित दुतराजका अधिकांश सिर्जना ग्रामीण परिवेश, सामूहिक नृत्य र मौलिक लोकभाकामा आधारित छन्।

आफ्नै संकलन, रचना तथा गायन रहेका गीतलाई अब मौलिक लोकबाजाको ब्याण्डमार्फत प्रस्तुत गर्ने उनको योजना छ। पञ्चेबाजा, लोक तथा विभिन्न सांस्कृतिक बाजालाई प्रस्तुतिको मुख्य आधार बनाइनेछ।

दुतराज आउने खबरले देशभरका मेला तथा महोत्सवमा दर्शकको ठूलो भीड लाग्ने गरेको छ। दर्शकको यही रुचि र मागलाई ध्यानमा राखेर ब्याण्डको अवधारणा अघि सारेको उनले बताए।

‘यो मेरो सपना हो, सफलतामा पुग्ने चाहना छ,’ उनले भने, ‘पहिलो चरणको अभियानमा साथ, सहयोग र सुझाव दिएर लोकसंगीतको ब्याण्डलाई सफल बनाउने जिम्मा श्रोता–दर्शकको हुनेछ।’

नयाँ सांगीतिक अभ्यास

बन्द कोठामा गीत रेकर्ड गरेर श्रोता–दर्शकमाझ पुग्दै आएका दुतराज अब खुला मञ्चमा ठूलो समूह र मौलिक बाजासहित प्रस्तुत हुने तयारीमा छन्। उनले पत्रकार सम्मेलनमार्फत आफ्नो नयाँ सांगीतिक अभियानबारे जानकारी दिएका छन्।

पहिलो चरणमा निःशुल्क कार्यक्रम गर्दै देशभरका मेला तथा महोत्सवमा पुग्ने र अभियानलाई क्रमशः विस्तार गर्ने दुतराजको योजना छ।

Originally published on abcnews.com.np.