काठमाडौं । अभिनेत्री रेखा थापाको चलचित्र ‘माया भनेकै यस्तो होला’*को टिजर सार्वजनिक गरिएको छ। टिजरमा आकर्षण, प्रेम, विश्वास, विवाह, बाध्यता र धोकाजस्ता विषयलाई प्रस्तुत गरिएको छ।

सामाजिक परिवेशमा हुने प्रेम सम्बन्धका विभिन्न पाटो तथा विवाहपछि उत्पन्न हुने अन्तरद्वन्द्वलाई टिजरले संकेत गरेको निर्माण पक्षले जनाएको छ। चलचित्रको कथा प्रेम सम्बन्धसँगै त्यसपछि आउने बाध्यता र धोकामा केन्द्रित रहेको बताइएको छ।

भदौ २६ गतेदेखि प्रदर्शनमा आउने चलचित्रमा मदनकृष्ण श्रेष्ठ, दिल श्रेष्ठ, सृष्टि श्रेष्ठ, नम्रता श्रेष्ठ र नीति शाह मुख्य भूमिकामा छन्।

‘दिया एण्ड अमु फिल्मस्’को ब्यानरमा निर्माण भएको चलचित्रका निर्माता हरि नारायण श्रेष्ठ, माया देवी श्रेष्ठ, नवराज श्रेष्ठ, जस्मिन श्रेष्ठ र प्रकाश श्रेष्ठ हुन्।

प्रेम, सम्बन्ध र जीवनको कथा

चलचित्रको पटकथा ध्रुव लम्सालले लेखेका हुन्। प्रेम कथामार्फत सामाजिक भावना र परिवेशलाई प्रस्तुत गर्ने प्रयास गरिएको निर्माण पक्षले जनाएको छ। चलचित्रको कथावस्तुमा निर्देशक रेखा थापाको समेत योगदान रहेको छ।

चलचित्रमा सुदीप बरालको छायांकन रहेको छ। निर्माण पक्षका अनुसार ‘माया भनेकै यस्तो होला’ले प्रेम, सम्बन्ध र जीवनका वास्तविकतामाथि दर्शकलाई सोच्न बाध्य बनाउनेछ।

Originally published on abcnews.com.np.