महाशाखाका अनुसार देशभर मनसुनी वायुको प्रभाव कायमै छ। हाल बागमती र गण्डकी प्रदेशका धेरै स्थानमा, लुम्बिनी र कर्णाली प्रदेशका थोरै स्थान तथा कोशी प्रदेशका पहाडी भूभागका एक–दुई स्थानमा मध्यम वर्षा भइरहेको छ। गण्डकी प्रदेशका एक–दुई स्थानमा भारी वर्षासमेत भएको छ।

आइतबार र सोमबार पनि वर्षा

महाशाखाले आइतबार र सोमबार देशभर साधारणतया बदली रहने पूर्वानुमान गरेको छ। आइतबार गण्डकी, लुम्बिनी, कर्णाली र सुदूरपश्चिम प्रदेशका हिमाली तथा पहाडी भूभागका धेरै स्थानमा मेघगर्जन र चट्याङसहित मध्यम वर्षाको सम्भावना छ।

कोशी र बागमती प्रदेशका हिमाली तथा पहाडी भूभागका केही स्थानमा पनि मध्यम वर्षा हुन सक्ने महाशाखाले जनाएको छ।

गण्डकी र कर्णालीका पहाडी भूभाग तथा लुम्बिनी र सुदूरपश्चिमका पहाडी एवं तराई भूभागका एक–दुई स्थानमा भारी वर्षाको सम्भावना रहेको छ।

सोमबार पनि गण्डकी, लुम्बिनी, कर्णाली र सुदूरपश्चिमका हिमाली तथा पहाडी भूभागका धेरै स्थानमा वर्षाको सम्भावना रहनेछ। कोशी र बागमतीका हिमाली तथा पहाडी भूभागका केही स्थानमा समेत मध्यम वर्षा हुन सक्ने जनाइएको छ।

सुदूरपश्चिममा धेरै भारी वर्षाको जोखिम

महाशाखाले गण्डकी, लुम्बिनी, कर्णाली र सुदूरपश्चिमका पहाडी भूभाग तथा लुम्बिनी र सुदूरपश्चिमका तराई भूभागमा भारी वर्षाको सम्भावना रहेको जनाएको छ।

विशेषगरी सुदूरपश्चिम प्रदेशका पहाडी तथा तराई भूभागका एक–दुई स्थानमा धेरै भारी वर्षा हुन सक्ने भएकाले आवश्यक सतर्कता अपनाउन महाशाखाले आग्रह गरेको छ।

भारी वर्षाका कारण बाढी, पहिरो तथा सडक आवागमनमा अवरोध हुन सक्ने भएकाले जोखिमयुक्त क्षेत्रमा रहेका नागरिकलाई सतर्क रहन तथा आवश्यक सावधानी अपनाउन अनुरोध गरिएको छ।