काठमाडौं । नेपालमा मनसुनजन्य विपद् तथा अन्य प्राकृतिक प्रकोपका कारण पछिल्लो २४ घण्टामा १३ जनाको मृत्यु भएको छ भने ५ जना बेपत्ता भएका छन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले सार्वजनिक गरेको पछिल्लो बुलेटिनअनुसार ४३ जिल्लामा ५२ वटा विपद्का घटना भएका छन्। ती घटनामा ४३ जना घाइते भएका छन्।
पहिरोबाट मात्रै १० जनाको मृत्यु
प्राधिकरणका अनुसार पछिल्लो २४ घण्टामा पहिरोबाट मात्रै १० जनाको मृत्यु भएको छ। विपद्का कारण देशभर १२ स्थानमा सडक आवागमन पूर्ण रूपमा अवरुद्ध भएको छ।
यस्तै, पाँच चौपायाको क्षति भएको र करिब ६ लाख ४७ हजार रुपैयाँ बराबरको भौतिक क्षति भएको प्रारम्भिक अनुमान गरिएको छ।
विपद् प्रतिकार्य तथा उद्धारका लागि देशभर २ सय ६१ जना प्रहरी परिचालन गरिएको छ भने दुई जनाको सकुशल उद्धार गरिएको प्राधिकरणले जनाएको छ।
स्याङ्जामा १५२.९ मिलिमिटर वर्षा
जल तथा मौसम विज्ञान विभागका अनुसार आज बिहान ८ः४५ बजेसम्म ४ सय १४ वर्षा मापन केन्द्रमध्ये ३ सय ४५ केन्द्रमा वर्षा मापन भएको छ।
सबैभन्दा धेरै वर्षा स्याङ्जाको पञ्चमुलमा १५२.९ मिलिमिटर रेकर्ड भएको छ।
२४ घण्टाको अवधिमा अधिकतम तापक्रम चितवनको रामपुरमा ३८ डिग्री सेल्सियस मापन भएको छ। न्यूनतम तापक्रम भने मुस्ताङको मार्फामा ८.८ डिग्री सेल्सियस रेकर्ड गरिएको छ।
वैशाखयता २२९ जनाको मृत्यु
चालु आर्थिक वर्ष २०८३ वैशाख १ गतेदेखि साउन २९ गतेसम्म देशभर ४ हजार ६ सय ५९ वटा विपद्का घटना भएका छन्।
यी घटनामा परी २२९ जनाको मृत्यु, ९ जना बेपत्ता र १ हजार ४ सय ६३ जना घाइते भएका छन्। विपद्बाट ५ हजार ७ सय ९ परिवार प्रभावित भएको प्राधिकरणको तथ्यांक छ।
यस अवधिमा सबैभन्दा बढी मानवीय क्षति सर्पदंश र पहिरोका कारण भएको प्राधिकरणले जनाएको छ।
Originally published on abcnews.com.np.
प्रतिक्रिया दिनुहोस्