रूपन्देही । समयमै तटबन्ध नभएकोले नारायणी नदीमा आएको बाढीको कारण पश्चिम नवलपरासीको सुस्तामा डुबान भएको छ भने कटान बढेपछि स्थानीयवासीमा त्रास बढेको छ। सो गाउँपालिका-५ को थारू टोलमा नारायणीको बाढीले जलमग्न भएको हो।

सुस्ता बचाउ युवा अभियानका संयोजक योगेन्द्र गौतमले समयमै तटबन्ध नगरिएकाले नेपाली सीमा रक्षक बनेर बसेका सुस्तावासी डुबानको कारण थप समस्यामा परेको जनाएका छन् । कटान बढेपछि स्थानीयमा त्रास बढेको उनले जानकारी दिए।

तीन तर्फबाट नारायणी नदी र एकतर्फ भारतीय भूभागले घेरिएको यो बस्तीमा नारायणी नदीमा बाढी आएपछि हरेक वर्ष जलमग्न हुने सधैंको समस्या रहेको छ । सुस्तामा धेरै घर जलमग्न भएको स्थानीयवासीले जनाएका छन्। नारायणी नदीमा भरपर्दो तटबन्ध नहुँदा सुस्तामा बाढी, खेतीयोग्य जमिन कटानको जोखिम बढेको छ।

तटबन्ध निर्माणमा अवरोध

बाढी रोकनका लागि आफैं तटबन्ध बाँध्नका लागि स्थानीयवासी कस्सिए पनि भारतले तटबन्ध गर्न अवरोध गरेको स्थानबाट बाढी बस्तीमा पसेको गौतमले जनाए। बाढीको जोखिम क्षेत्रमा स्थानीय र सुरक्षाकर्मी मिलेर विगत १५ दिनदेखि नदीमा अस्थायी तटबन्धको काम गरिरहेका छन्।

साउन १७ गते आइतबार सुस्ता गाउँपालिका-५ सुस्ता गाउँमा भारतीय सुरक्षाकर्मी प्रवेश गरेर अस्थायी तटबन्ध खन्न लागेपछि स्थानीयवासीले प्रतिकार गरेर लखेटिएका थिए । जेठ २९ गते नारायणी नदीमा १ सय ३२ मिटर तटबन्ध निर्माणमा भारतीय सुरक्षाकर्मीले रोक लगाएपछि स्थानीयले भारतीय सुरक्षाकर्मीलाई लखेटेका थिए।

१ करोड ४० लाख रुपैयाँ तटबन्धको लागि विनियोजन भए पनि काम हुन नसकेपछि स्थानीयवासीले माटोको तटबन्ध बनाएका थिए । अहिले भारतीय पक्षले तटबन्ध गर्न अवरोध गरेको सुस्ता थारु टोलबाट बाढी बस्तीमा पसेको सुस्ता बचाउ अभियानका प्रवक्ता रविन्द्र जैसवाल बताउँछन्।

बाढीले पुर्‍याएको क्षति

शुक्रबार दिउँसो सुस्तामा बाढी पसेको र केही घर जलमग्न भएको छ । अन्य क्षतिको विवरण आउन बाँकी रहेको र उद्धारका लागि सुरक्षाकर्मी तैनाथ रहेको जिल्ला प्रहरी कार्यालयका सूचना अधिकारी डीएसपी मदन थापाले जानकारी दिए।

सुरक्षा अवस्था

प्रहरीले तत्कालै उद्दार तथा राहतको काम सुरु गरेको छ। बाढीले थप क्षति पुर्‍याउन सक्ने सम्भावना रहेकाले स्थानीयवासीलाई उच्च सतर्कता अपनाउन अनुरोध गरिएको छ।

Originally published on abcnews.com.np.