पोखरा । मुस्ताङको जोमसोममा भन्सार जाँचपास नगरी ल्याइएका आठ वटा कन्टेनर प्रहरीले नियन्त्रणमा लिएको छ। प्रहरीले शनिबार घरपझोङ गाउँपालिका–४ स्थित जोमसोम पर्यटक चेकपोस्टबाट चालकसहित ती कन्टेनर नियन्त्रणमा लिएको जनाएको छ।

अवैध वस्तु ओसारपसार भइरहेको भन्ने गोप्य सूचनाका आधारमा जिल्ला प्रहरी कार्यालय मुस्ताङबाट खटिएको टोलीले शनिबार दिउँसो करिब १२ बजे जोमसोम पर्यटक चेकपोस्टमा जाँच थालेको थियो। सो क्रममा कन्टेनरका कागजपत्र जाँच गर्नुका साथै चालकहरूसँग सोधपुछ गरिएको प्रहरीले जनाएको छ।

जाँचका क्रममा आठवटै कन्टेनर भन्सार यार्डमा आवश्यक चेकजाँच नगरी सिधै सिल लगाएर ल्याइएको पाइएको प्रहरीले जनाएको छ। प्रारम्भिक अनुसन्धानका क्रममा कन्टेनरभित्र अवैध वस्तु हुनसक्ने आशंका भएपछि कन्टेनर र चालकलाई नियन्त्रणमा लिइएको प्रहरीको भनाइ छ।

नियन्त्रणमा लिइएका आठवटै कन्टेनर र चालकलाई थप अनुसन्धान तथा आवश्यक कारबाहीका लागि राजस्व अनुसन्धान कार्यालय, हरिहरभवन पठाइएको प्रहरीले जनाएको छ।

नियन्त्रणमा लिइएका कन्टेनर र चालकहरू :

१. ना.६ ख ४७४१ नम्बरको कन्टेनर र धार्के गाउँपालिका–२, धादिङका ३० वर्षीय चालक ईश्वर थापा।

२. को.१ ख ५६९६ नम्बरको कन्टेनर र शैलुङ गाउँपालिका–३, दोलखाका ४३ वर्षीय चालक रत्नबहादुर तामाङ।

३. बागमती प्रदेश ०१–००६ ख २२४८ नम्बरको कन्टेनर र भीमेश्वर नगरपालिका–८, दोलखाका २९ वर्षीय चालक उद्धव बस्नेत।

४. बागमती प्रदेश ०१–००६ ख ६२७३ नम्बरको कन्टेनर र तानसेन नगरपालिका–८, पाल्पाका ३६ वर्षीय चालक धर्मबहादुर नेपाली।

५. ना.३ ख ७१६० नम्बरको कन्टेनर र भोटेकोशी गाउँपालिका–२, सिन्धुपाल्चोकका ३५ वर्षीय चालक कर्म शेर्पा।

६. ना.६ ख २०२२ नम्बरको कन्टेनर र जुगल गाउँपालिका–५, सिन्धुपाल्चोकका ३३ वर्षीय चालक निरोज नेपाली।

७. बागमती प्रदेश ०१–००६ ख ६६११ नम्बरको कन्टेनर र पाँचखाल नगरपालिका–८, काभ्रेका २३ वर्षीय चालक विशाल तामाङ।

८. बागमती प्रदेश ०१–००५ ख २२४५ नम्बरको कन्टेनर र भोटेकोशी गाउँपालिका, सिन्धुपाल्चोकका ३६ वर्षीय चालक गोपाल श्रेष्ठ।

Originally published on abcnews.com.np.