काठमाडौं । नेपाल आयल निगमले आइतबार काठमाडौं उपत्यकामा सात विक्री केन्द्रबाट खाना पकाउने एलपी ग्यास वितरण गर्ने भएको छ।

निगमका अनुसार टेकु परिसरबाट नेपाल, एचपी, एभरेष्ट, सुगम, श्रीराम र सगर ब्रान्डका ग्यास बिक्री हुनेछ। बुढानीलकण्ठको पशु सेवा शाखा चपलीबाट नेपाल, एचपी र भानु ग्यास उपलब्ध हुनेछन्।

त्यस्तै, कीर्तिपुरस्थित राधास्वामी केन्द्रबाट नेपाल, एचपी, एभरेष्ट, सुगम, श्रीकृष्ण, साइबाबा र श्रीमाया ब्रान्डका ग्यास बिक्री गरिनेछ। नयाँ बजारस्थित जुडो हल परिसरबाट नेपाल, एचपी र ओम ग्यास वितरण हुनेछ।

तारकेश्वर नगरपालिका परिसरबाट नेपाल र एचपी ग्यास तथा चन्द्रागिरि नगरपालिका परिसरबाट लोकप्रिय, नेपाल, एचपी र श्रीमाया ब्रान्डका ग्यास बिक्री गरिने निगमले जनाएको छ।

राष्ट्रिय क्षयरोग केन्द्र ठिमीबाट नेपाल, एचपी, सूर्य, सगर, एभरेष्ट/सुगम र एसटीसी ब्रान्डका ग्यास बिक्री हुनेछन्।

निगमले ग्यास खरिद गर्न आउने उपभोक्तालाई नागरिकता वा राष्ट्रिय परिचयपत्र साथमा लिएर बिक्री केन्द्रमा उपस्थित हुन आग्रह गरेको छ।

शनिबार ६ हजार ८०२ सिलिन्डर बिक्री

निगमले शनिबार काठमाडौंका विभिन्न पाँच बिक्री केन्द्रबाट ६ हजार ८०२ सिलिन्डर ग्यास बिक्री गरेको थियो। जिल्ला प्रशासन कार्यालय काठमाडौंसँगको समन्वयमा ती केन्द्र तोकिएका थिए।

सबैभन्दा बढी टेकु परिसरबाट दुई हजार २९० सिलिन्डर बिक्री भएको थियो। बबरमहलबाट एक हजार ६००, कीर्तिपुरको राधास्वामी केन्द्रबाट ७६२, यातायात कार्यालय चाबहिलबाट ७२० र राधास्वामी केन्द्रबाट ६०० सिलिन्डर बिक्री भएको निगमले जनाएको छ।

त्यस्तै, बालाजुबाट ५०० तथा साल्ट ट्रेडिङको जडीबुटी र कालिमाटी काउन्टरबाट ३३० सिलिन्डर बिक्री भएको थियो।

Originally published on abcnews.com.np.