काठमाडौं । नेपाल आयल निगमले आज आइतबार पनि काठमाडौंका विभिन्न ७ स्थानबाट खाना पकाउने एलपी ग्यास बिक्री–वितरण गर्ने भएको छ।

निगमका अनुसार टेकु, बुढानीलकण्ठ, कीर्तिपुर, नयाँ बजार, नयाँ बानेश्वर, बबरमहल र चन्द्रागिरिका तोकिएका स्थानबाट विभिन्न ब्रान्डका ग्यास बिक्री गरिनेछ।

कुन ठाउँमा कुन ग्यास ?

• टेकु परिसर: नेपाल, एचपी, एभरेस्ट, सुगम, श्रीराम र सागर
• बुढानीलकण्ठ पशु सेवा शाखा, चापली: नेपाल, एचपी र भानु
• कीर्तिपुर राधास्वामी परिसर: नेपाल, एचपी, एभरेस्ट, सुगम, श्रीकृष्ण, साइबाबा र श्रीमाया
• नयाँ बजार जुडो हल परिसर: नेपाल, एचपी र ओम
• नयाँ बानेश्वर होटल परिसर: नेपाल, एचपी र ओम
• बबरमहल पुरानो जिल्ला प्रशासन कार्यालय परिसर: नेपाल र एचपी
• चन्द्रागिरि नगरपालिका कार्यालय: लोकप्रिय, नेपाल, एचपी र श्रीमाया

यस्तै, कीर्तिपुरस्थित राष्ट्रिय आयुर्वेद अनुसन्धान तथा तालिम केन्द्रबाट नेपाल, एचपी, सूर्य, एभरेस्ट, सुगम र एसटीसी ब्रान्डका ग्याससमेत बिक्री–वितरण गरिने निगमले जनाएको छ।

नागरिकता वा राष्ट्रिय परिचयपत्र चाहिने

निगमले कुनै कारणले नियमित डिलरबाट ग्यास प्राप्त गर्न नसकेका उपभोक्ताले नागरिकता वा राष्ट्रिय परिचयपत्रका आधारमा नजिकको तोकिएको बिक्री केन्द्रबाट ग्यास खरिद गर्न सक्ने व्यवस्था गरेको छ।

निगमले एलपी ग्यासको आयात नियमित रूपमा भइरहेको दाबी गर्दै उपभोक्तालाई सहज रूपमा ग्यास उपलब्ध गराउन सम्बन्धित व्यवसायीलाई आफ्ना विक्रेतामार्फत नियमित बिक्री गर्नसमेत अनुरोध गरेको छ।

ग्यास अभावका कारण काठमाडौंका विभिन्न बिक्री केन्द्रमा पछिल्ला दिनमा उपभोक्ताको लामो लाइन लाग्दै आएको छ। निगमले आपूर्ति सहज बनाउन वैकल्पिक बिक्री केन्द्रमार्फत समेत ग्यास वितरण गरिरहेको छ।

Originally published on abcnews.com.np.