जाजरकोट । जाजरकोटको भेरी नगरपालिका–२ रिसाङमा लगातारको वर्षापछि गएको पहिरोमा परी घाइते भएका ५२ वर्षीय केदार कार्कीको उपचारका क्रममा मृत्यु भएको छ। गम्भीर घाइते कार्कीलाई थप उपचारका लागि हिजो नै कोहलपुर मेडिकल कलेज रेफर गरिएको थियो।

कार्कीको उपचारकै क्रममा आज बिहान मृत्यु भएको उनका आफन्त टीकारजंग वलीले जानकारी दिएका छन्।

पहिरोमा परी थप दुई जना बेपत्ता भएका छन्। जिल्ला प्रहरी कार्यालय जाजरकोटका सूचना अधिकारी एवं प्रहरी निरीक्षक सुधीरकुमार खड्काका अनुसार बेपत्ता हुनेमा भेरी नगरपालिका–२ फारुलाका ५४ वर्षीय उमासिंह खत्री र सोही वडाको चिसापानीका ७० वर्षीय भीमबहादुर कार्की रहेका छन्।

पहिरोबाट सात जना घाइते भएका छन्। घाइते हुनेमा भेरी नगरपालिका–२ का ६० वर्षीय रामबहादुर शाही, ५७ वर्षीया भद्राकली कार्की, ४५ वर्षीय सिद्धिबहादुर कामी, ४५ वर्षीय मनवीर चँदरा, ४७ वर्षीया मोतिकला विक र १६ वर्षीया मनिषा विक छन्।

घाइतेमध्ये तीन जनाको अवस्था गम्भीर रहेको प्रहरीले जनाएको छ। उनीहरूलाई जिल्ला अस्पताल जाजरकोटमा प्राथमिक उपचारपछि थप उपचारका लागि नेपालगन्ज रेफर गरिएको प्रहरी निरीक्षक खड्काले जानकारी दिए।

घाइते तथा प्रभावितको उद्धारका लागि अस्थायी प्रहरी पोष्ट रावतगाउँबाट प्रहरी सहायक निरीक्षक धर्मराज ढुङ्गानाको नेतृत्वमा पाँच जनाको टोली परिचालन गरिएको छ।

पहिरोले भेरी नगरपालिका–३ जाजरकोट स्यालाका पूर्णबहादुर विकको छकोठे दुईतले ढुङ्गामाटोले बनेको कच्ची घर पूर्ण रूपमा क्षति भएको छ। सोही गाउँकी भैरवी केसीका दुईवटा टिनका अस्थायी टहरा पनि पहिरोले बगाएको प्रहरीले जनाएको छ।

घटनाको जानकारी पाएलगत्तै जिल्ला प्रहरी कार्यालयबाट प्रहरी निरीक्षक राजेश शाहीको नेतृत्वमा ११ जना तथा सशस्त्र प्रहरी बल नेपाल आश्रित गुल्म हेडक्वार्टरबाट सशस्त्र प्रहरी निरीक्षक कमल कार्कीको नेतृत्वमा १० जनाको टोली उद्धारका लागि घटनास्थलतर्फ परिचालन गरिएको थियो।

अविरल वर्षा र ठाउँ–ठाउँमा पहिरो खसिरहेका कारण प्रभावित क्षेत्रमा पुग्न सुरक्षाकर्मीलाई समेत कठिनाइ भइरहेको छ। जाजरकोटका प्रमुख जिल्ला अधिकारी खडानन्द अधिकारीका अनुसार बिहानैदेखि नेपाली सेना, नेपाल प्रहरी र सशस्त्र प्रहरीको टोली खोज तथा उद्धार कार्यमा परिचालित छन्।

बेपत्ता दुई जनाको खोजी तथा घाइतेहरूको उद्धार र उपचारलाई प्राथमिकतामा राखेर सुरक्षा निकायले प्रभावित क्षेत्रमा खोजी कार्य जारी राखेको छ।

Originally published on abcnews.com.np.