काठमाडौं । भारतका लागि पूर्वनेपाली राजदूत प्रा. हर्षनारायण धौभडेलको निधन भएको छ।

लामो समयदेखि पार्किन्सन्स रोगबाट पीडित ९० वर्षीय धौभडेलको क्यानाडाको क्यालगरीमा निधन भएको हो। अस्पतालमा उपचार सम्भव नभएपछि उनलाई छोरी निशाको घरमा राखिएको थियो। सोही क्रममा उनको निधन भएको ज्वाइँ ज्योति वैद्यले जानकारी दिएका छन्।

धौभडेलका चार छोरीमध्ये तीन जना क्यानाडा र एक जना अमेरिकामा बस्दै आएका छन्।

भारतका लागि राजदूत

नेकपा एमाले नेतृत्वको तत्कालीन सरकारले धौभडेललाई २०५१ माघ १८ गते भारतका लागि नेपाली राजदूत नियुक्त गरेको थियो।

राजदूतका रूपमा उनले नेपाल–भारत द्विपक्षीय सम्बन्ध विस्तारमा महत्वपूर्ण भूमिका निर्वाह गरेको बताइन्छ।

शिक्षा र पारिवारिक पृष्ठभूमि

प्रा. धौभडेलले संयुक्त राज्य अमेरिकाको ओरेगन विश्वविद्यालयबाट शिक्षा विषयमा स्नातकोत्तर गरेका थिए।

भक्तपुर पुर्ख्यौली घर भएका धौभडेलको जन्म १९९२ फागुनमा सिराहामा भएको थियो। उनका हजुरबुबा शंकरदास रोजगारीका क्रममा सिराहा पुगेपछि परिवार तराई क्षेत्रमा बसोबास गर्न थालेको थियो।

Originally published on abcnews.com.np.