काठमाडौँ । २३औँ एनएसजेएफ पल्सर स्पोर्ट्स अवार्ड २०८२ अन्तर्गत पिपल्स च्वाइस विधाको मनोनयन सार्वजनिक भएको छ।

नेपाल खेलकुद पत्रकार मञ्च (एनएसजेएफ) ले आइतबार पत्रकार सम्मेलन गर्दै भलिबलकी मीना सुनार, फुटबलकी पूजा राना, करातेकी सानुमाया थिङ, क्रिकेटका शेर मल्ल र मिक्स मार्सल आर्ट्स (एमएमए) का रवीन्द्र ढाँटलाई मनोनित गरेको जनाएको हो।

यस वर्ष पिपल्स च्वाइस अवार्डको मतदान डिजिटल वालेट खल्ती बाई आईएमईमार्फत हुनेछ। एनएसजेएफ र खल्तीबीच आइतबार मतदान साझेदारसम्बन्धी सम्झौतासमेत भएको छ।

मतदानमा नयाँ व्यवस्था

यसपटक पिपल्स च्वाइसको मतदान प्रक्रियामा परिवर्तन गरिएको छ। अब एक समर्थकले दिनमा एकपटक मात्र मतदान गर्न पाउनेछन् र प्रत्येक मतका लागि १० रुपैयाँ शुल्क तोकिएको छ।

विगतमा रकमको सीमा नराखी मतदान गर्न सकिने व्यवस्थाका कारण धेरै रकम खर्च गर्ने उम्मेदवारले बढी मत पाउने अवस्था देखिएकाले नयाँ व्यवस्था गरिएको एनएसजेएफले जनाएको छ।

विजेता छनोटमा खल्ती बाई आईएमईको मतभार ५० प्रतिशत हुनेछ। बाँकी ५० प्रतिशत मतभार खेल पत्रकार, राष्ट्रिय प्रशिक्षक, सामाजिक सञ्जालका समर्थक तथा एनएसजेएफका सदस्यबाट प्राप्त मतको हुनेछ।

विजेताले पल्सर मोटरसाइकल पुरस्कार प्राप्त गर्नेछन्। गत वर्ष भलिबलका हिमाल सुनारीले पिपल्स च्वाइस अवार्ड जितेका थिए।

को–को छन् मनोनयनमा ?

• मीना सुनार — भलिबल
• पूजा राना — फुटबल
• सानुमाया थिङ — कराते
• शेर मल्ल — क्रिकेट
• रवीन्द्र ढाँट — एमएमए

मीना सुनार राष्ट्रिय महिला भलिबल टोलीकी सदस्य हुन् भने पूजा राना राष्ट्रिय महिला फुटबल खेलाडी हुन्। सानुमाया थिङ करातेमा अन्तर्राष्ट्रिय प्रतियोगितामा पदक जितेकी खेलाडी हुन्।

त्यस्तै, शेर मल्ल राष्ट्रिय क्रिकेट टोलीका युवा खेलाडी हुन्। रवीन्द्र ढाँट एमएमएका चर्चित खेलाडी हुन्, जसलाई ‘बझाङका बाघ’ भनेर चिनिन्छ।

Originally published on abcnews.com.np.