काठमाडौं । हरेक वर्ष साउन शुक्ल पञ्चमी अर्थात् नागपञ्चमीका दिन ललितपुरको धापाखेलस्थित नागदहमा लाग्ने मेलाको सम्पूर्ण तयारी पूरा भएको छ।

यस वर्ष सोमबार हुने नागपञ्चमी मेलाका लागि प्रचारप्रसार, सुरक्षा, सरसफाइ, गङ्गा आरती, पूजा तथा बजार व्यवस्थापनलगायतका तयारी पूरा भएको नागदह विकास तथा संरक्षण समितिले जनाएको छ।

ललितपुर महानगरपालिका–२४ का वडाध्यक्ष एवं समितिका अध्यक्ष दिनेशजंग पाण्डेका अनुसार मेलाका दिन बिहान ४ बजेदेखि नै भक्तजनका लागि दर्शनको व्यवस्था मिलाइएको छ।

नागको पूजा गर्दा घरमा सुख–शान्ति मिल्ने, अन्नबाली राम्रो हुने तथा छालासम्बन्धी रोग निको हुने जनविश्वास रहेको वडाध्यक्ष पाण्डेले बताए।

भक्तजनको घुइँचो लाग्ने

नागपञ्चमीका अवसरमा उपत्यका तथा आसपासका जिल्लाबाट भक्तजन नागदहमा पुग्ने गर्छन्। भक्तजनले दहमा स्नान गर्नुका साथै विभिन्न भाकल राखेर नाग मन्दिरमा पूजा तथा दर्शन गर्ने परम्परा रहिआएको छ।

मेलामा धापाखेल, झरुवाराशी, चापागाउँ, ठैव, हरिसिद्धी, लुभु, लेले, गोदावरी, छम्पी, सातदोबाटोलगायत ललितपुरका विभिन्न क्षेत्रबाट ठूलो संख्यामा भक्तजन आउने अपेक्षा गरिएको छ।

५२ रोपनीमा फैलिएको नागदह

प्राकृतिक रूपमा बनेको नागदह करिब ५२ रोपनी क्षेत्रफलमा फैलिएको छ। समितिका अनुसार दहको औसत गहिराइ करिब २५ फिट रहे पनि मध्यभागमा ४१ फिटसम्म गहिरो छ। दहको चौडाइ करिब ९३७ मिटर रहेको जनाइएको छ।

प्राचीन तालका रूपमा परिचित नागदह धार्मिक तथा सांस्कृतिक दृष्टिले समेत महत्वपूर्ण मानिन्छ। काठमाडौँ उपत्यकाको पानी चोभार गल्छीबाट बाहिरिएपछि यहाँ प्राकृतिक रूपमा दह बनेको र त्यसबेला उपत्यकाका नागहरू यहाँ आएर बसोबास गरेको जनविश्वासका आधारमा नागको पूजा गर्ने परम्परा सुरु भएको स्थानीय विश्वास छ।

Originally published on abcnews.com.np.