काठमाडौं । नेपाल आयल निगमले भदौ १ गतेदेखि खाना पकाउने एलपी ग्यासको बिक्री–वितरण डिलरबाटै हुने जनाएको छ ।

निगमले सम्बन्धित ग्यास उद्योगले नियुक्त गरेका बिक्रेतामार्फत नियमित प्रक्रियाअनुसार ग्यास बिक्री–वितरणको व्यवस्था मिलाइएको जनाएको हो । निगमले उपभोक्तालाई आफूलाई पायक पर्ने ग्यास बिक्रेतासँग सम्पर्क गरी सिलिण्डर खरिद गर्न आग्रह गरेको छ ।

ग्यास वितरणलाई व्यवस्थित र प्रभावकारी बनाउन निगमले पाँचबुँदे निर्देशन जारी गरेको छ । जसअनुसार ग्यास उद्योगहरूले दैनिक बिक्री गर्ने बिक्रेता तथा वितरकको नाम, ठेगाना, सम्पर्क नम्बर र सिलिण्डर संख्यासहितको विवरण हरेक दिन बिहान ९ बजेसम्म निगमलाई उपलब्ध गराउनुपर्नेछ ।

यस्तै, ग्यास बिक्रेता तथा वितरकले बिक्री गरेको ग्यासको परिमाण, उपभोक्ताको नाम र सम्पर्क नम्बरसहितको विवरण दैनिक रूपमा तयार गरी सम्बन्धित उद्योगलाई बुझाउनुपर्नेछ । उद्योगले सोही दिन उक्त विवरण निगमलाई उपलब्ध गराउनुपर्नेछ ।

निगमले ग्यास वितरणमा अत्यावश्यक घरायसी प्रयोजनका उपभोक्तालाई उच्च प्राथमिकता दिन निर्देशन दिएको छ । ग्यास ढुवानी तथा वितरणमा सुरक्षाका लागि सम्बन्धित जिल्ला प्रशासन कार्यालयमा गृह मन्त्रालयमार्फत सहजीकरणका लागि अनुरोध गरिएको निगमले जनाएको छ ।

त्यस्तै, वाणिज्य, आपूर्ति तथा उपभोक्ता संरक्षण विभागसँगको समन्वयमा निगमबाट खटिएका जनशक्तिसहितको संयुक्त टोलीले ग्यास वितरणको अनुगमन गर्ने व्यवस्था मिलाइएको छ ।

नजिकको बिक्रेताबाट कुनै कारणले ग्यास प्राप्त गर्न नसकेका र तत्काल ग्यास आवश्यक परेका उपभोक्ताले निगमको क्विक रेस्पोन्स टिम (क्यूआरटी) मा सम्पर्क गर्न सक्नेछन् । त्यसका लागि ९८५१४५५१२४ र ९८५१४५५१२८ नम्बरमा सम्पर्क गर्न निगमले आग्रह गरेको छ ।

Originally published on abcnews.com.np.