काठमाडौं । उद्यमी तथा नाइमा मोबिलिटीका संस्थापक सौरभ ज्योतीले नेपालमा एसेम्बल उद्योग स्थापना गरेर मात्रै औद्योगिकीकरण पूरा नहुने बताएका छन् । उनले आवश्यक पार्टपुर्जा तथा कम्पोनेन्टको स्थानीय उत्पादन बढाउँदै आपूर्ति शृङ्खला विकास गर्नुपर्नेमा जोड दिए ।

उनले औद्योगिकीकरणका लागि सरकारले स्पष्ट समयसीमा र औद्योगिक नीतिको निरन्तरता दिनुपर्ने बताए । नेपालको अटोमोबाइल क्षेत्रमा पछिल्ला वर्षमा एसेम्बल उद्योग विस्तार हुँदै गएको उल्लेख गर्दै अब पार्टपुर्जाको स्थानीय उत्पादन र आपूर्ति शृङ्खला विकासतर्फ अघि बढ्नुपर्ने उनको भनाइ छ ।

‘अटोमोबाइल क्षेत्रमा विशेषगरी ‘मेड इन नेपाल’भन्दा पनि पहिलो स्टेप ‘मेक इन नेपाल’ हो । ‘मेक इन नेपाल’ औद्योगिकीकरणको पहिलो चरण हो,’ उनले भने, ‘५–१० वर्षमा हामी ‘मेक इन नेपाल’बाट ‘मेड इन नेपाल’मा जान सक्छौँ र धेरै पार्ट्स, कम्पोनेन्ट तथा डोमेस्टिक मटेरियल कन्टेन्टतिर जान सक्छौँ ।’

नेपालमा पछिल्लो समय एक दर्जनभन्दा बढी एसेम्बल उद्योग स्थापना भइसकेको उनले बताए । चारपांग्रे सवारीतर्फ हुन्डाईको एसेम्बली उद्योग सञ्चालनमा रहेको तथा दुईपांग्रे सवारीतर्फ विभिन्न प्रमुख ब्रान्डका मोटरसाइकल तथा स्कुटर नेपालमै एसेम्बल हुँदै आएको उनले उल्लेख गरे ।

तर एसेम्बली उद्योग स्थापना गरेर मात्रै औद्योगिकीकरण पूरा नहुने उनको भनाइ छ । त्यसका लागि आवश्यक पार्टपुर्जा तथा कम्पोनेन्टको स्थानीय उत्पादन बढाउनुपर्ने र सरकारले स्पष्ट समयसीमासहितको नीति बनाएर त्यसको निरन्तरता सुनिश्चित गर्नुपर्ने उनले बताए ।

ज्योतीले अटोमोबाइल क्षेत्रले नेपालको अर्थतन्त्र र सरकारी राजस्वमा महत्वपूर्ण योगदान गरिरहेको दाबी गरे । आर्थिक वर्ष २०८२/८३ को तथ्यांकअनुसार अटोमोबाइल क्षेत्रको कुल गार्हस्थ्य उत्पादन (जीडीपी) मा करिब ७ प्रतिशत योगदान रहेको र सरकारले यस क्षेत्रबाट करिब ८९ अर्ब रुपैयाँ राजस्व प्राप्त गर्दै आएको उनले बताए ।

नेपालमा विद्युतीय तथा अन्य स्वच्छ ऊर्जामा आधारित सवारीसाधनको प्रयोग बढाउन सरकारले लिएको नीतिलाई पनि उनले सकारात्मक रूपमा लिनुपर्ने बताए । पेट्रोलमा इथानोल मिसाउने नीतिले आयातित इन्धनमा निर्भरता घटाउनुका साथै प्रदूषण न्यूनीकरणमा समेत सहयोग पुग्ने उनको भनाइ छ ।

ज्योतीका अनुसार नेपालमा करिब ८६ प्रतिशत रोजगारी निजी क्षेत्रले सिर्जना गरिरहेको छ भने निजी क्षेत्रले करिब ८२ प्रतिशत जीडीपीमा योगदान गरिरहेको छ । निजी क्षेत्रका उद्यमीलाई सम्मान र लगानीको सुरक्षा सुनिश्चित गर्न सके आगामी दशकमा नेपालको अर्थतन्त्रले ठूलो फड्को मार्न सक्ने उनले बताए ।

Originally published on abcnews.com.np.