काठमाडौं । नेपाली मौलिक तीज गीत ‘पति परमेश्वर’ सार्वजनिक भएको छ। बद्री पङ्गेनी र हेमन्ता भट्टराईको स्वर रहेको गीतमा अविशेक खड्का, गीता ढुङ्गाना, पुष्कर अवस्थी र करुणा पाण्डेको अभिनय छ।

विक्रम चौहानले निर्देशन गरेको गीतको भिडियो साउन ३१ गते आइतबार दिउँसो ४ बजे पुष्कर अवस्थीको युट्युब च्यानलमार्फत सार्वजनिक गरिएको हो।

निर्माण पक्षका अनुसार पछिल्लो समय तीजको मौलिकता र पर्वको मर्मभन्दा तडकभडकलाई प्राथमिकता दिने गीतहरू सार्वजनिक भइरहेका बेला ‘पति परमेश्वर’ले तीजको धार्मिक तथा पारिवारिक भावलाई प्रस्तुत गरेको छ।

गीतमा पार्वतीले भगवान् शिवको दीर्घायु, सुख र शान्तिको कामना गर्दै व्रत बसेको धार्मिक प्रसङ्गलाई आधार बनाइएको छ। श्रीमान्–श्रीमतीबीचको प्रेम, आपसी समझदारी र समर्पणले परिवारमा सुख, शान्ति र खुसी ल्याउने सन्देश गीतमार्फत दिन खोजिएको निर्माण पक्षले जनाएको छ।

गीतका शब्द तथा सङ्गीत हेमन्ता भट्टराईको रहेको छ भने एरेन्ज विनोद बाजुरेलीले गरेका छन्। गीतको रेकर्डिङ काठमाडौंस्थित मालाश्री रेकर्डिङ स्टुडियोमा गरिएको हो।

भक्तपुरको गुन्डु मन्दिरमा छायाङ्कन गरिएको भिडियोमा अविशेक खड्का, गीता ढुङ्गाना, पुष्कर अवस्थी र करुणा पाण्डेको अभिनय रहेको छ।

हरेक वर्ष तीजका अवसरमा मौलिक गीत प्रस्तुत गर्दै आएको बताउँदै गायिका हेमन्ता भट्टराईले यस वर्ष पनि दर्शक तथा श्रोताका लागि मौलिक तीज गीत ल्याएको बताइन्। उनले गीतलाई दर्शक तथा श्रोताबाट विगतमा जस्तै माया र साथ पाउने विश्वास व्यक्त गरिन्।

Originally published on abcnews.com.np.