काठमाडौं । प्रधानमन्त्री वालेन्द्र शाहको खोजी गर्दै विपक्षी दलहरूले प्रतिनिधिसभामा गर्दै आएको विरोध ७५औँ दिनमा रोकिएको छ।

प्रधानमन्त्री शाहले गत जेठ १७ गते प्रतिनिधिसभामा ‘भारतले पनि नेपालको भूमि मिचेको रहेछ’ भन्ने अभिव्यक्ति दिएपछि विपक्षी दलहरूले निरन्तर विरोध गर्दै आएका थिए। उनीहरूले प्रधानमन्त्रीको उक्त अभिव्यक्ति सच्याउन सभामुखमार्फत रुलिङ हुनुपर्ने माग राख्दै आएका थिए।

जेठ २७ गतेसम्म विपक्षी दलहरूले संसद् अवरुद्ध नै गरेका थिए। त्यसपछि परराष्ट्रमन्त्री शिशिर खनालले संसद्मा जवाफ दिएपछि विपक्षी दलहरू सदनको अवरोध हटाउन तयार भएका थिए। तर, त्यसपछि पनि बैठक सुरु हुनेबित्तिकै उठेर विरोध जनाउँदै प्रधानमन्त्रीको जवाफ माग गर्दै आएका थिए।

सोमबारको बैठक सुरु भएपछि पनि विपक्षी दलका सांसदहरू उठेर विरोध जनाएका थिए।

त्यसपछि सभामुख डोलप्रसाद अर्यालले विपक्षी दलको मागप्रति आफ्नो ध्यानाकर्षण भएको भन्दै प्रधानमन्त्रीलाई संसद्मा उपस्थित भएर सांसदका प्रश्नको जवाफ दिन निर्देशन दिए।

सभामुखले प्रतिनिधिसभा नियमावलीका विभिन्न व्यवस्थाअनुसार प्रधानमन्त्रीलाई प्रश्नको जवाफ दिन रुलिङ गरेका हुन्।

‘प्रतिनिधिसभा नियमावलीको नियम ५६ बमोजिम प्रधानमन्त्री वा प्रधानमन्त्रीको कार्यक्षेत्रसँग सम्बन्धित महत्त्वपूर्ण विषयमा प्रश्नोत्तरको माग गर्दै गरिरहनुभएको विरोधप्रति मेरो ध्यानाकर्षण भएकै छ,’ सभामुखले भने।

उनले थपे, ‘यसै सन्दर्भमा प्रतिनिधिसभाको बैठकमा उपस्थित भई नियमावलीको नियम ५६, ५७, ५८, ५९ र ६० बमोजिम माननीय सदस्यहरूको प्रश्नको जवाफ दिन म सम्माननीय प्रधानमन्त्रीलाई निर्देश गर्दछु।’

रुलिङपछि बसे विपक्षी सांसद

सभामुखले विपक्षी दलहरूको मागअनुसार आफूले रुलिङ गरिसकेको भन्दै अब सभा सञ्चालनमा सहयोग गर्न आग्रह गरे।

सभामुखको रुलिङपछि विपक्षी दलका सांसदहरू आ–आफ्नो सिटमा बसेका थिए। त्यसपछि सभामुखले बैठकको नियमित कार्यसूची अघि बढाउँदै आकस्मिक समयमा बोल्ने सांसदहरूलाई समय दिएका थिए।

प्रधानमन्त्रीको अभिव्यक्तिलाई लिएर लामो समयदेखि जारी विवादमा सभामुखको रुलिङसँगै तत्कालका लागि संसद्भित्रको विरोध रोकिएको छ।

अब प्रधानमन्त्री शाहले संसद्मा उपस्थित भएर विपक्षी सांसदहरूले उठाउँदै आएका प्रश्नको जवाफ दिने बाटो खुलेको छ। प्रधानमन्त्रीको जवाफपछि यो विषयमा विपक्षी दलहरूको आगामी रणनीति कस्तो हुन्छ भन्ने चासोसमेत बढेको छ।

Originally published on abcnews.com.np.