काठमाडौं । नेपाली कांग्रेसका सभापति गगनकुमार थापाले आफ्नो नेतृत्व र अनुहारका कारण पार्टीले अपेक्षित मत प्राप्त गर्न नसकेको भन्ने आलोचनाप्रति असन्तुष्ट पक्षलाई विशेष महाधिवेशनमार्फत नेतृत्व परिवर्तन गर्न चुनौती दिएका छन्।

सोमबार ललितपुरको सानेपास्थित पार्टी केन्द्रीय कार्यालयमा जारी केन्द्रीय कार्यसमितिको बैठकमा बोल्दै थापाले आफ्नो अनुहारका कारण कांग्रेसले मत नपाएको निष्कर्ष हो भने अर्को उम्मेदवार खडा गरेर आफूलाई नेतृत्वबाट हटाउन सकिने बताए।

“मेरो अनुहारका कारण भोट नआएको र मेरो ठाउँमा अरू कसैको अनुहार भएको भए धेरै भोट आउँथ्यो भन्ने कुरा पनि उठेको रहेछ। होला पनि। त्यसो हो भने यही विषय अधिवेशनमा लिएर गए हुन्छ,” थापाले भने, “महाधिवेशनमा अर्को साथीले नेतृत्वका लागि प्रतिस्पर्धा गर्न सक्नुहुन्छ र मलाई हराएर पार्टीको नेतृत्व सम्हाल्न सक्नुहुन्छ।”

उनले लोकतान्त्रिक प्रक्रियाबाट नेतृत्व परिवर्तन गर्न असन्तुष्ट पक्षलाई आह्वान गर्दै अधिवेशनमा सबैको सहभागिता, निष्पक्षता र समान अवसर सुनिश्चित गर्नुपर्ने बताए।

“त्यसका लागि अधिवेशनमा सबैको सहभागिता, निष्पक्षता र समान अवसर सुनिश्चित हुने वातावरण बनाउनुपर्छ। के–कस्ता सर्त र प्रक्रियाले सबैलाई अधिवेशन निष्पक्ष र न्यायपूर्ण भएको महसुस हुन्छ, त्यसका लागि हामी छलफल गर्न र आवश्यक व्यवस्था गर्न तयार छौँ,” उनले भने।

थापाले पार्टीभित्रको आन्तरिक लोकतन्त्रलाई बलियो बनाउन र नेतृत्वको विषयलाई पारदर्शी ढङ्गले टुंग्याउन आफू सधैँ सकारात्मक रहेको बताए।

उनले कांग्रेसको अधिवेशन सबैको सहभागिता र निष्पक्ष प्रतिस्पर्धाका आधारमा हुनुपर्नेमा जोड दिँदै त्यसका लागि आवश्यक प्रक्रिया र व्यवस्थाबारे छलफल गर्न आफू तयार रहेको स्पष्ट पारे।

Originally published on abcnews.com.np.