म्याग्दी । बाढी र पहिरोका कारण म्याग्दीमा निर्माणाधीन जलविद्युत् आयोजनाको काम प्रभावित भएको छ। सडकमार्ग अवरुद्ध हुँदा निर्माण सामग्री, उपकरण र इन्धन ढुवानीमा समस्या भएपछि जिल्लाका विभिन्न आयोजनाको निर्माण गति सुस्त भएको हो।

धवलागिरि गाउँपालिकामा निर्माणाधीन अपर म्याग्दी–१, माथिल्लो म्याग्दी, म्याग्दीखोला, मुदीखोला र दरखोला जलविद्युत् आयोजनाको निर्माण कार्य बाढीपहिरोका कारण प्रभावित भएको छ। यी आयोजनाको क्षमता क्रमशः ५३.५, ३७, ६५, १४ र ६.५ मेगावाट रहेको छ।

त्यसैगरी, अन्नपूर्ण गाउँपालिका–४ नारच्याङमा निर्माणाधीन ९.१४ मेगावाट क्षमताको सुपर घलेम्दी जलविद्युत् आयोजनाको निर्माणस्थलसँगको यातायात सम्पर्कसमेत विच्छेद भएको छ।

नारच्याङको रेलेखर्क क्षेत्रबाट आएको बाढी बाँधमा थुप्रिएपछि ६ मेगावाट क्षमताको रेलेखोला जलविद्युत् आयोजना गत असारको अन्तिम सातादेखि बन्द रहेको छ। यस्तै, गत साउन २६ गते सुक्खा पहिरोले विद्युत्गृह पुरिएपछि अन्नपूर्ण गाउँपालिका–६ मा रहेको १४ मेगावाट क्षमताको घारखोला जलविद्युत् आयोजनाको विद्युत् उत्पादन पनि ठप्प भएको छ। उक्त पहिरोमा परी एक जनाको मृत्यु भएको थियो भने अर्का एक जना घाइते भएका थिए।

निर्माण सामग्री ढुवानीमा समस्या

अपर म्याग्दीखोला–१ का आयोजना प्रमुख ज्योतिकुमार केसीका अनुसार घुमाउने (फापरखेत), बाङ्गेपहिरो र इल्पु क्षेत्रमा पहिरो तथा शिवरात्रिखोलामा आएको बाढीका कारण गत असारदेखि सिमेन्ट, रडलगायत निर्माण सामग्री र उपकरण बोकेका सवारीसाधन आयोजना स्थलसम्म पुग्न सकेका छैनन्।

“मौजुदा उपकरण र निर्माण सामग्री परिचालन गरेर कामलाई निरन्तरता दिएका छौँ,” केसीले भन्नुभयो, “तर बाढीपहिरोका कारण सामग्री ढुवानी प्रभावित हुँदा अपेक्षित गतिमा निर्माण अघि बढाउन सकेका छैनौँ।”

शिवरात्रिखोलामा पूर्वाधार विकास कार्यालयमार्फत निर्माण भइरहेको मोटरेबल पुलको काममा ढिलाइ हुँदा वर्षायाममा सवारीसाधन आवतजावतमा समस्या भएको म्याग्दीखोला जलविद्युत् आयोजनाका जनसम्पर्क अधिकृत बुद्धिराज अधिकारीले बताउनुभयो।

उहाँका अनुसार खोलामा बाढीको सतह बढ्नुका साथै पहुँचमार्गमा पहिरो खस्ने क्रम नरोकिँदा निर्माण कार्य प्रभावित भएको छ। “वैकल्पिक उपाय अपनाउँदै मौजुदा सामग्री परिचालन गरेर काम गर्नुपर्दा निर्माणको गतिमा असर परेको छ,” उहाँले भन्नुभयो, “डोजरको सहायताले सामान बोकेका गाडी तार्ने र पहिरो पन्छाएर सवारीसाधन वारपार गराउने अवस्था छ।”

अन्य आयोजनामा पनि असर

करिब ६० प्रतिशत भौतिक प्रगति हासिल गरेको माथिल्लो म्याग्दी जलविद्युत् आयोजनाले पनि बाढीपहिरोका कारण निर्माण कार्य प्रभावित भएको जनाएको छ। ३७ मेगावाट क्षमतामा निर्माण भइरहेको उक्त आयोजनाको क्षमता बढाएर ४६.२५ मेगावाट पुर्‍याउने प्रक्रिया अघि बढाइएको छ।

त्यस्तै, बेनी–दरबाङ तथा दरबाङ–धारापानी–ताकम–मुना सडकखण्डअन्तर्गत थापाचौर, गौथली र दाचौर भिरमा गएको पहिरोका कारण निर्माण सामग्री ढुवानी गर्न समस्या भएको दरखोला हाइड्रोपावरका अध्यक्ष रेशम भण्डारीले बताउनुभयो।

सडकमार्गमा देखिएको अवरोधका कारण जलविद्युत् आयोजनाका निर्माण सामग्री तथा उपकरण ढुवानी प्रभावित हुँदा बर्खायाममा आयोजनाको निर्माण कार्यमा थप चुनौती देखिएको छ।

Originally published on abcnews.com.np.