कालीकोट । खाँडाचक्र नगरपालिका क्षेत्रमा ठूलो पहिरो जाँदा बजार क्षेत्रका दर्जनौँ घर जोखिममा परेका छन्। नगरपालिकाको नयाँ प्रशासनिक भवन निर्माण भइरहेको क्षेत्रमा पहिरो गएपछि आसपासका घरको जगसमेत प्रभावित भएको स्थानीयवासीले बताएका छन्।

भिरालो तथा भौगोलिक रूपमा संवेदनशील क्षेत्रमा पर्याप्त सुरक्षा र पूर्वसावधानीबिना निर्माण कार्य अघि बढाउँदा पहिरोको जोखिम बढेको स्थानीयको आरोप छ। डोजर प्रयोग गरी जमिन उत्खनन गरिएको स्थानमा वर्षासँगै पहिरो खसेको बताइएको छ।

पहिरोका कारण केही घरको जगमुनिको माटो बगेको छ भने केही घर पहिरोको डिलमै पुगेका छन्। जुनसुकै बेला घर भत्किन सक्ने जोखिम बढेपछि स्थानीयवासी त्रासमा रात बिताउन बाध्य भएका छन्।

स्थानीयवासीका अनुसार तत्कालीन भौतिक पूर्वाधार तथा यातायात मन्त्री शुनिल लम्सालले निर्माणस्थलको निरीक्षण गर्दै जोखिमयुक्त क्षेत्रमा भवन निर्माण नगर्न र काम रोक्न सुझाव दिएका थिए। पहिरो नियन्त्रणका लागि पर्खाल निर्माण गरी सडक तथा बस्ती सुरक्षित गर्नसमेत उनले निर्देशन दिएको स्थानीयको भनाइ छ।

तर, प्राविधिक सुझाव बेवास्ता गर्दै निर्माण कार्यलाई निरन्तरता दिइएको स्थानीयले आरोप लगाएका छन्। प्रभावित क्षेत्रमा पहिरो थप फैलिन नदिन प्लास्टिकले ढाकिएको भए पनि यो दीर्घकालीन समाधान नभएको उनीहरूको भनाइ छ।

स्थानीय पवित्र शाहीले नागरिकका घर जोखिममा पारेर नयाँ प्रशासनिक भवन निर्माण गर्नु उचित नभएको बताइन्। “भवन त बन्न सक्छ, तर पहिरोले घर बगाए त्यसको क्षतिपूर्ति कसले दिन्छ ?” उनले प्रश्न गरिन्।

स्थानीय हिकमतजङ मल्लले समयमै सचेत गराउँदा पनि सम्बन्धित निकायले गम्भीरता नदेखाएको आरोप लगाए। उनले जोखिममा परेका घर तथा बस्तीको तत्काल संरक्षण गर्न र लापरबाही गर्नेहरूमाथि छानबिन तथा कारबाही गर्न माग गरे।

यता, खाँडाचक्र नगरपालिकाका इन्जिनियर रत्न भण्डारीले प्रशासनिक भवन निर्माणका लागि तयार गरिएको विस्तृत परियोजना प्रतिवेदन (डीपीआर) र निर्माणस्थलबीच असमानता देखिएको बताएका छन्। आफूले त्यसकारण अन्तिम फाइलमा हस्ताक्षर नगरेको उनको भनाइ छ।

पहिरोका कारण बजार तथा बस्ती नै जोखिममा परेपछि तत्काल भू–प्राविधिक अध्ययन गरी दीर्घकालीन संरक्षणको काम अघि बढाउनुपर्ने स्थानीयको माग छ।

Originally published on abcnews.com.np.