काठमाडौं । लामो समयदेखि अभिनेता आकाश श्रेष्ठ र अभिनेत्री तथा मोडल करुणा श्रेष्ठबीच प्रेम सम्बन्ध रहेको चर्चा चलिरहेका बेला आकाशले पहिलोपटक सार्वजनिक रूपमा आफ्नो सम्बन्ध स्वीकार गरेका छन्।

आकाशले मंगलबार बिहान इन्स्टाग्राममा करुणासँगको रोमान्टिक तस्बिर पोस्ट गर्दै आफूहरूको प्रेम सम्बन्ध पाँच वर्ष पुगेको खुलासा गरेका हुन्।

तस्बिरसँगै उनले लेखेका छन्, ‘हाम्रो पाँच वर्ष। हामी पछाडिका असंख्य सुन्दर क्षणहरू। जीवनमा अझै गन्नै नसकिने सुन्दर क्षणहरूको प्रतिक्षामा र जिन्दगीभर।’

आकाश र करुणाले लामो समयदेखि प्रेम सम्बन्धको चर्चा भए पनि यसअघि सम्बन्धबारे औपचारिक रूपमा स्वीकार गरेका थिएनन्। उनीहरूले एकसाथ विभिन्न म्युजिक भिडियोमा समेत काम गरिसकेका छन्।

करुणाले डेब्यू गरेको फिल्म ‘सयकडा दश’ व्यावसायिक रूपमा सफल हुन नसकेपछि उनी म्युजिक भिडियोमा बढी सक्रिय हुँदै आएकी छन्।

यसअघि दुवैले सामाजिक सञ्जालमा रोमान्टिक तस्बिरहरू सार्वजनिक गर्दै आए पनि सम्बन्धबारे मौन रहँदै आएका थिए। तर यसपटक आकाशले नै सार्वजनिक रूपमा प्रेम सम्बन्ध स्वीकार गरेपछि उनीहरूको पाँच वर्ष लामो सम्बन्ध औपचारिक रूपमा सार्वजनिक भएको हो।

Originally published on abcnews.com.np.