काठमाडौं । रुसी अधिकारीहरूले राजधानी मस्को क्षेत्रलाई लक्षित गरी युक्रेनले ६२० भन्दा बढी ड्रोन आक्रमण गरेको दाबी गरेका छन्। उनीहरूका अनुसार पछिल्ला दुई वर्षयता मस्कोमाथि भएको यो सबैभन्दा ठूलो ड्रोन आक्रमणमध्ये एक हो।

मस्कोका मेयर सर्गेई सोब्यानिनका अनुसार सोमबार साँझदेखि मंगलबार बिहान ५ बजेसम्म राजधानी क्षेत्रतर्फ आएका १८० वटा ड्रोन रुसी रक्षा प्रणालीले खसालेको थियो। रुसी सरकारी समाचार एजेन्सी तासले समेत यसलाई पछिल्ला दुई वर्षमा मस्कोमाथि भएको सबैभन्दा ठूलो ड्रोन आक्रमणका रूपमा उल्लेख गरेको छ।

मस्को क्षेत्रका गभर्नर एन्ड्रे भोरोब्योभले आक्रमणमा १० वर्षीया बालिकासहित तीनजना घाइते भएको बताएका छन्। उनका अनुसार पाभलोभस्की पोसाद जिल्लामा सबैभन्दा ठूलो क्षति भएको छ, जहाँ एउटा घर जलेर नष्ट भएको छ।

बोगोरोद्स्की जिल्लामा समेत केही घर र एउटा पाहुनाघरमा क्षति पुगेको उनले जानकारी दिएका छन्।

वाइल्डबेरीजको गोदाममा क्षति

ड्रोन आक्रमणका क्रममा मस्कोको पूर्वी क्षेत्रमा रहेको ई–कमर्स कम्पनी वाइल्डबेरीजको एउटा गोदाममा समेत क्षति पुगेको बताइएको छ।

युक्रेनले रुसी ड्रोन निर्माणका लागि आवश्यक पार्टपुर्जा उपलब्ध गराएको आरोप लगाउँदै पछिल्ला केही सातादेखि वाइल्डबेरीजका विभिन्न गोदामलाई लक्षित गर्दै आक्रमण गरिरहेको रुसी पक्षको दाबी छ।

युक्रेनमा पनि रुसी आक्रमण

यसैबीच, रुसले पनि युक्रेनका विभिन्न क्षेत्रमा ड्रोन आक्रमण गरेको छ। युक्रेनी वायुसेनाका अनुसार रातको समयमा १४७ वटा रुसी ड्रोन प्रयोग गरिएकोमा १११ वटा खसालिएको वा निष्प्रभावी पारिएको थियो।

खार्किभ क्षेत्रका गभर्नर ओलेह सिन्येहुबोभका अनुसार इज्युम सहरमा भएको रुसी ड्रोन आक्रमणमा नौ वर्षीय बालकसहित पाँचजना घाइते भएका छन्।

किभ क्षेत्रको ब्रोभारी सहरमा पनि रुसी ड्रोन आक्रमणका कारण आगलागी भएको छ। त्यहाँ कार्यालय भवन र गोदामलगायत संरचनामा क्षति पुगेको स्थानीय अधिकारीहरूले बताएका छन्।

मस्को र युक्रेनका विभिन्न क्षेत्रमा एकै समयमा भएका यी ड्रोन आक्रमणले रुस–युक्रेन युद्धमा हवाई आक्रमणको दायरा र तीव्रता थप बढ्दै गएको संकेत गरेको छ।

Originally published on abcnews.com.np.