काठमाडौं । नेपालमा कार्यरत केही विदेशी चिकित्सकले पेश गरेका शैक्षिक तथा व्यावसायिक प्रमाणपत्र फर्जी रहेको पाइएको नेपाल मेडिकल काउन्सिलले जनाएको छ। काउन्सिलले मंगलबार सार्वजनिक सूचना जारी गर्दै विदेशी चिकित्सकको दर्ता तथा पेशागत प्रमाणपत्रमाथि छानबिन सुरु गरिएको जानकारी दिएको हो।

काउन्सिलका निमित्त रजिस्ट्रार डा. दिपेन्द्र पाण्डेका अनुसार विदेशी नागरिक चिकित्सकहरूको दर्ता तथा प्रमाणपत्र छानबिन गर्न विशेष समिति गठन गरिएको छ।

नेपालमा चिकित्सकीय अभ्यासका लागि दर्ता गर्न विदेशी चिकित्सकहरूले आवश्यक कागजात पेश गरेका थिए। तीमध्ये केही कागजात शंकास्पद देखिएपछि काउन्सिलले सम्बन्धित देशका मेडिकल नियामक निकाय तथा मेडिकल काउन्सिलसँग सम्पर्क गरी प्रमाणपत्रको आधिकारिकता जाँच गरेको थियो।

छानबिनका क्रममा केही विदेशी चिकित्सकले पेश गरेका ‘गुड स्ट्यान्डिङ सर्टिफिकेट’ सम्बन्धित नियामक निकायबाट जारी नभएको पुष्टि भएको काउन्सिलले जनाएको छ। ती प्रमाणपत्र फर्जी रहेको पुष्टि भएपछि काउन्सिलले विदेशी नागरिक चिकित्सकको दर्ता प्रक्रियामै तत्काल रोक लगाएको हो।

केही चिकित्सकको दर्ता प्रक्रिया स्थगित

काउन्सिलका अनुसार फर्जी कागजात पेश गरेको पुष्टि भएका केही विदेशी चिकित्सक तथा थप छानबिनमा रहेका चिकित्सकहरूको दर्ता प्रक्रिया स्थगित गरिएको छ।

काउन्सिलले विदेशी चिकित्सकको दर्तालाई थप कडाइका साथ परीक्षण गर्ने निर्णयसमेत गरेको छ। विशेषगरी विदेशबाट जारी हुने शैक्षिक योग्यता, व्यावसायिक अनुमति, गुड स्ट्यान्डिङ सर्टिफिकेटलगायतका कागजात सम्बन्धित नियामक निकायबाटै जारी भएको हो कि होइन भन्ने विषयमा प्रत्यक्ष प्रमाणीकरण गरिने भएको छ।

मेडिकल कलेज र अस्पतालसँग स्पष्टीकरण

काउन्सिलले विदेशी चिकित्सकको दर्ताका लागि सिफारिस गर्ने स्वास्थ्य संस्थासँग समेत स्पष्टीकरण मागेको छ।

कागजातको आधिकारिकता यकिन नगरी विदेशी चिकित्सकको दर्ताका लागि सिफारिस गरेको पाइएपछि सम्बन्धित मेडिकल तथा डेन्टल कलेज, अस्पताल, स्वास्थ्य विज्ञान प्रतिष्ठान, आवेदक विदेशी चिकित्सक र उनीहरूको कागजात सनाखत गर्ने नेपाली चिकित्सकसँग लिखित स्पष्टीकरण मागिएको डा. पाण्डेले बताए।

स्पष्टीकरण माग गरिएका सम्बन्धित व्यक्तिहरूलाई आवश्यक बयानका लागि काउन्सिलमा उपस्थित गराउने निर्णयसमेत गरिएको छ।

विदेशी चिकित्सकको समग्र अवस्था जाँचिँदै

काउन्सिलले नेपालका विभिन्न मेडिकल तथा डेन्टल कलेज, स्वास्थ्य विज्ञान प्रतिष्ठान र अस्पतालमा कार्यरत विदेशी चिकित्सकको दर्ता अवस्था, कार्यक्षेत्र र व्यावसायिक गतिविधिबारे समेत विस्तृत अनुसन्धान गर्ने भएको छ।

यसका लागि गठन गरिएको विशेष समितिले विदेशी चिकित्सकहरूले पेश गरेका प्रमाणपत्र, उनीहरूको दर्ता प्रक्रिया तथा नेपालमा भइरहेको व्यावसायिक अभ्यासको आवश्यक परीक्षण गर्नेछ।

काउन्सिलले विदेशी चिकित्सकका शैक्षिक तथा व्यावसायिक योग्यताको पूर्ण प्रमाणिकता सुनिश्चित गर्नु आफ्नो नियामक जिम्मेवारी भएको जनाएको छ।

स्वास्थ्य सेवाको गुणस्तरमा कडाइ

चिकित्सकको शैक्षिक योग्यता तथा व्यावसायिक प्रमाणपत्रको आधिकारिकता स्वास्थ्य सेवाको गुणस्तर र बिरामीको सुरक्षासँग प्रत्यक्ष जोडिने भएकाले प्रमाणपत्र प्रमाणीकरणमा थप कडाइ गर्नुपर्ने आवश्यकता देखिएको काउन्सिलको भनाइ छ।

फर्जी प्रमाणपत्रका आधारमा चिकित्सकीय अभ्यास भइरहेको पाइएमा सम्बन्धित व्यक्ति मात्र नभई दर्ताका लागि सिफारिस गर्ने संस्था र कागजात प्रमाणित गर्ने जिम्मेवार व्यक्तिमाथि समेत आवश्यक कानुनी तथा नियामक कारबाही अघि बढाइने संकेत काउन्सिलले दिएको छ।

विशेष समितिको अनुसन्धानपछि विदेशी चिकित्सकको दर्ता, प्रमाणपत्रको वैधता र सम्बन्धित स्वास्थ्य संस्थाको भूमिकाबारे थप निर्णय गरिने काउन्सिलले जनाएको छ।

Originally published on abcnews.com.np.