म्युनिख । इङ्ल्यान्डका कप्तान ह्यारी केनले जर्मन क्लब बायर्न म्युनिखसँग आफ्नो सम्झौता नवीकरणका विषयमा छलफल सुरु गर्न तयार रहेको बताएका छन्।

सन् २०२३ को अगस्टमा टोटनह्याम हटस्परबाट ८ करोड ६४ लाख पाउन्डमा बायर्न पुगेका केनको चार वर्षे सम्झौताको अब अन्तिम १२ महिना बाँकी छ।

गत सिजन भिन्सेन्ट कोम्पनीको टोलीले बुन्डेसलिगा र कपको उपाधि जित्दा केनले बायर्नका लागि सबै प्रतियोगितामा ५१ खेल खेल्दै ६१ गोल गरेका थिए। उनले सम्झौता नवीकरणबारे यसै साता वा अर्को साताबाट क्लब व्यवस्थापनसँग छलफल सुरु हुने बताएका छन्।

केनले दुवै पक्ष सम्झौता नवीकरणका विषयमा सकारात्मक र सहज अवस्थामा रहेको बताएका छन्। उनले सम्झौता सकिन एक वर्ष मात्र बाँकी रहेकाले अब छलफल सुरु गर्ने उपयुक्त समय भएको उल्लेख गरे।

बायर्नका लागि केनको प्रदर्शन प्रभावशाली रहँदै आएको छ। उनले बुन्डेसलिगाका तीन सिजनमा ९४ खेल खेल्दै ९८ गोल गरेका छन्। यस क्रममा उनले लगातार तीनपटक बुन्डेसलिगा गोल्डेन बुटसमेत जितेका छन्।

सन् २०२६ को विश्वकपमा पनि केनले इङ्ल्यान्डका लागि ६ गोल गरेको जनाइएको छ। यससँगै विश्वकपमा उनले १८ खेलबाट १४ गोल गर्दै इङ्ल्यान्डका लागि सर्वाधिक गोल गर्ने खेलाडीको कीर्तिमान बनाएका छन्।

३३ वर्षीय केन पछिल्लो समय उत्कृष्ट लयमा देखिएका छन्। बुन्डेसलिगामा लगातार तीन सिजन गोल्डेन बुट जित्नुले पनि उनको गोल गर्ने क्षमता र बायर्नमा उनको प्रभावलाई स्पष्ट पार्छ।

Originally published on abcnews.com.np.