तानसेन। बुधबार बिहान सिद्धार्थ राजमार्गअन्तर्गत तिनाउ गाउँपालिका–३ स्थित सिद्धबाबा सुरुङमार्ग क्षेत्रमा पहिरो खस्दा सडक अवरुद्ध भएको छ।

जिल्ला प्रहरी कार्यालय पाल्पाका प्रहरी नायब उपरीक्षक भीमलाल भट्टराईका अनुसार पाल्पातर्फको सुरुङमार्गबाट करिब एक सय मिटर नजिकै माथिबाट ढुङ्गासहितको पहिरो खसेपछि सडक पूर्णरूपमा बन्द भएको हो।

पहिरो खस्ने क्रम अझै जारी रहेकाले तत्काल सडक खुलाउन समस्या भइरहेको प्रहरीले जनाएको छ। पहिरो रोकिएपछि मात्र सडकबाट पहिरो हटाउने काम सुरु गरिने प्रहरी नायब उपरीक्षक भट्टराईले बताए।

राजमार्ग अवरुद्ध भएपछि बुटवलबाट पाल्पातर्फ जाने र पाल्पाबाट बुटवलतर्फ आउने सयौँ सवारीसाधन बाटोमै रोकिएका छन्। ट्राफिक प्रहरीले पहिरो हटाएपछि एकैपटक ठूलो जाम नहोस् भनेर विभिन्न स्थानमा सवारीसाधन रोकेर व्यवस्थापन गरिरहेको जनाएको छ।

पहिरोका कारण यात्रुहरू बीचबाटोमै रोकिएपछि आवागमनमा थप समस्या भएको छ। तत्काल वैकल्पिक मार्गको व्यवस्था हुन नसकेकाले राजमार्गमै सवारीसाधन रोकिएका छन्।

Originally published on abcnews.com.np.