कैलाली । कैलालीको बर्दगोरिया गाउँपालिका–३ स्थित लालीगुराँस सामुदायिक वनमा बन्दुक पड्किँदा एक जनाको मृत्यु भएको छ।

इलाका प्रहरी कार्यालय बौनियाका प्रहरी निरीक्षक डम्बर विष्टका अनुसार घटनामा स्थानीय ४२ वर्षीय पदम विश्वकर्माको मृत्यु भएको हो। विश्वकर्मा वनभित्र बन्दुकको छर्रा लागेर घाइते भएका थिए। उनको घटनास्थलमै मृत्यु भएको प्रहरीले जनाएको छ।

प्रहरीका अनुसार विश्वकर्मा वन्यजन्तुको सिकारका लागि जंगल गएको हुन सक्ने प्रारम्भिक अनुमान गरिएको छ। उनीसँगै जंगल गएका एक जनालाई प्रहरीले नियन्त्रणमा लिएर घटनाबारे सोधपुछ गरिरहेको छ।

बन्दुक कसले चलाएको भन्ने विषय भने खुल्न सकेको छैन। विश्वकर्मासँगै रहेको बन्दुकबाटै गोली चलेको हो वा अन्य कुनै कारणले घटना भएको हो भन्नेबारे अनुसन्धान भइरहेको प्रहरी निरीक्षक विष्टले बताए।

घटनास्थलको निरीक्षण तथा नियन्त्रणमा लिइएका व्यक्तिसँगको सोधपुछपछि घटनाको वास्तविकता खुल्ने प्रहरीले जनाएको छ।

Originally published on abcnews.com.np.