काठमाडौं । नेपाल राष्ट्र बैंकले बैंक तथा वित्तीय संस्थाबाट ३५ अर्ब रुपैयाँ बराबरको ६ महिने निक्षेप संकलन गर्ने भएको छ।

केन्द्रीय बैंकले बुधबार सूचना जारी गर्दै १८० दिनका लागि निक्षेप संकलन उपकरणको बोलकबोल तथा निष्कासन गर्न लागेको जनाएको हो। बोलकबोल आज अपराह्न ३ बजेसम्म अनलाइन बिडिङ सिस्टममार्फत मात्र हुनेछ।

यस निक्षेपको ब्याजदर बोलकबोलबाट निर्धारण हुनेछ भने साँवा तथा ब्याज आगामी फागुन ३ गते भुक्तानी गरिनेछ। सहभागी बैंक तथा वित्तीय संस्थाले न्यूनतम १० करोड रुपैयाँदेखि अधिकतम आह्वान रकमसम्म, १० करोडले भाग जाने गरी बोल गर्न सक्नेछन्।

राष्ट्र बैंकबाट इजाजतपत्र प्राप्त ‘क’, ‘ख’ र ‘ग’ वर्गका बैंक तथा वित्तीय संस्था मात्र बोलकबोलमा सहभागी हुन पाउनेछन्। उनीहरूले आफूले जम्मा गर्न चाहेको रकम र ब्याजदर उल्लेख गर्नुपर्नेछ।

राष्ट्र बैंकका अनुसार रकम बाँडफाँट गर्दा सबैभन्दा कम ब्याजदरलाई प्राथमिकता दिइनेछ। समान ब्याजदरमा परेको बोलको रकम कुल निष्कासित रकमभन्दा बढी भए ‘प्रो–राटा’ आधारमा बाँडफाँट गरिनेछ। बोल स्वीकार वा अस्वीकार गर्ने सम्पूर्ण वा आंशिक अधिकार राष्ट्र बैंकको खुला बजार कारोबार सञ्चालन समितिलाई रहनेछ।

स्वीकृत बोलबमोजिमको रकम सम्बन्धित बैंक तथा वित्तीय संस्थाको राष्ट्र बैंकस्थित खाताबाट कट्टा गरी निक्षेपको छुट्टै खातामा जम्मा गरिनेछ। निष्कासनको दिन खातामा पर्याप्त मौज्दात नभए सम्बन्धित संस्थालाई कालोसूचीमा राखी आगामी बोलकबोलमा सहभागी हुन रोक लगाइने राष्ट्र बैंकले जनाएको छ।

राष्ट्र बैंकका अनुसार निक्षेप संकलनबाट प्राप्त रकम सम्बन्धित संस्थाको लगानी पोर्टफोलियोमा गणना गर्न सकिनेछ। तर, अनिवार्य नगद मौज्दात (सीआरआर)मा भने गणना गर्न पाइने छैन। वैधानिक तरलता अनुपात (एसएलआर) तथा तरलता अनुपातमा भने उक्त रकम गणना गर्न सकिनेछ।

Originally published on abcnews.com.np.