काठमाडौं । नेपाल रेडक्रस सोसाइटीको जग्गा खरिद प्रक्रियामा करोडौँ रुपैयाँ अनियमितता तथा ठगी गरेको आरोपमा केन्द्रीय अनुसन्धान ब्युरो (सीआईबी)ले पाँच जनालाई पक्राउ गरेको छ।

भक्तपुरमा रेडक्रसको गोदाम घर निर्माणका लागि जग्गा खरिद गर्दा बोलपत्रको सर्तविपरीत बिचौलिया प्रयोग गरेको तथा कागजातमा उल्लेख भएकोभन्दा कम क्षेत्रफलको जग्गा खरिद गरिएको अनुसन्धानबाट खुलेपछि उनीहरूलाई पक्राउ गरिएको सीआईबीले जनाएको छ।

सीआईबीका अनुसार २०७३ सालमा भक्तपुर नगरपालिका–४ (क) मा ५ रोपनी १३ आना ३ पैसा क्षेत्रफलको जग्गा खरिद गर्ने सम्झौता भएको थियो। उक्त जग्गाका लागि ६ करोड ३२ लाख ८१ हजार २५० रुपैयाँ भुक्तानी गरिएको थियो। तर, बोलपत्रको सर्तविपरीत बिचौलियामार्फत जग्गा खरिद गरिएको र १ करोड ९३ लाख ७५० रुपैयाँ बिचौलियाले लिएको अनुसन्धानबाट खुलेको छ।

नापी कार्यालय भक्तपुरबाट जग्गा नापजाँच गराउँदा कागजातमा उल्लेख भएभन्दा कम अर्थात् ५ रोपनी ६ आना २ पैसा १ दाम मात्रै क्षेत्रफल रहेको पाइएको सीआईबीले जनाएको छ।

अनुसन्धानका क्रममा रेडक्रसका पदाधिकारी तथा कर्मचारीले पदको दुरुपयोग गरी संस्थालाई आर्थिक क्षति पुर्‍याएको देखिएको सीआईबीको दाबी छ।

पक्राउ पर्नेमा रेडक्रसका पूर्वअध्यक्ष सञ्जिव थापा, राजेश देशमरु, उमेशप्रसाद ढकाल, मदनकृष्ण फोजु र इन्द्रबहादुर केसी रहेका छन्। भक्तपुर जिल्ला अदालतबाट पक्राउ अनुमति लिएर उनीहरूलाई पक्राउ गरिएको सीआईबीले जनाएको छ।

पक्राउ परेका पाँचै जनालाई थप अनुसन्धान तथा कानुनी कारबाहीका लागि जिल्ला प्रहरी परिसर भक्तपुर पठाइएको सीआईबीका प्रवक्ता एवं प्रहरी वरिष्ठ उपरीक्षक अनुपमशमशेर जबराले जानकारी दिए।

महिला, बालबालिका तथा ज्येष्ठ नागरिक मन्त्रालयबाट प्राप्त प्रतिवेदनका आधारमा सीआईबीले अनुसन्धान अघि बढाएको जनाएको छ।

Originally published on abcnews.com.np.