रूपन्देही । पहिरो खसेर अवरुद्ध भएको सिद्धार्थ राजमार्ग सञ्चालनमा आएको छ। पाल्पा–बुटवल सडकखण्डअन्तर्गत तिनाउ गाउँपालिका–३ स्थित दोभान क्षेत्रमा पहिरो हटाएपछि केही समयअघि राजमार्ग खुलेको प्रहरीले जनाएको छ।

सिद्धबाबा सुरुङमार्गको पाल्पातर्फबाट प्रवेश गर्ने बिन्दुभन्दा करिब १०० मिटर उत्तरतर्फ सडक माथिबाट पहिरो खसेपछि राजमार्ग अवरुद्ध भएको थियो। पहिरोसँगै सडकमा ढुङ्गा, माटो र लेदो थुप्रिएपछि केही समय सवारीसाधनको आवागमन पूर्ण रूपमा रोकिएको थियो।

प्रहरीका अनुसार पहिरो हटाएपछि अहिले सडकमा सवारीसाधन सञ्चालन हुन थालेका छन्। पहिरो प्रभावित क्षेत्रमा पुनः पहिरो खस्न सक्ने जोखिम रहेकाले चालक तथा यात्रुलाई सावधानी अपनाउन आग्रह गरिएको छ।

सिद्धार्थ राजमार्ग पाल्पासहित गुल्मी, अर्घाखाँची, स्याङ्जा, कास्की, पर्वत, म्याग्दी, मुस्ताङ र बागलुङलगायत पहाडी जिल्लालाई बुटवलसँग जोड्ने प्रमुख सडक हो। वर्षायाममा यस क्षेत्रमा पटक–पटक पहिरो खस्दा यातायात प्रभावित हुँदै आएको छ।

Originally published on abcnews.com.np.