काठमाडौं । नेपाल स्टक एक्सचेन्ज (नेप्से)ले बेनी सेक्युरिटिज प्रालि (ब्रोकर नं. ९३)लाई कारोबारमा प्रतिबन्ध लगाएपछि सेयर बजार लगानीकर्ता संघले आपत्ति जनाएको छ।

तोकिएको समयभित्र राफसाफ तथा फर्छ्योट नगरेको भन्दै ब्रोकरलाई निलम्बन गरिएपछि हजारौँ लगानीकर्ताको सेयर कारोबार प्रभावित भएको भन्दै संघले निर्णयप्रति गम्भीर ध्यानाकर्षण जनाएको हो।

नेप्सेले सीडीएस एन्ड क्लियरिङ लिमिटेडको सिफारिसमा भदौ ३ गते बेनी सेक्युरिटिजलाई तीन कार्यदिनका लागि निलम्बन गरेको थियो। तर, सिफारिस र निर्णय एउटै दिन भएको भन्दै संघले नियामकीय प्रक्रियामाथि प्रश्न उठाएको छ।

संघका महासचिव रवीन कँडेलले हतारमा गरिएको निर्णयले हजारौँ ग्राहकको हित र उनीहरूको सम्पत्तिको सुरक्षालाई बेवास्ता गरेको बताएका छन्। निलम्बन पत्रमा ग्राहकको मौज्दात रकम, सेयरको सुरक्षा तथा चालु कारोबारको फर्छ्योट कसरी गर्ने भन्ने स्पष्ट व्यवस्था नरहेको उनको भनाइ छ।

ब्रोकर वा उसका पदाधिकारीको गल्तीको असर निर्दोष लगानीकर्तामाथि पार्नु सामूहिक दण्डजस्तै भएको संघले जनाएको छ। बजार घटिरहेका बेला सेयर बिक्री गर्न वा उपयुक्त समयमा खरिद गर्न नपाउँदा लगानीकर्ताले प्रत्यक्ष आर्थिक क्षति व्यहोर्नुपर्ने संघको दाबी छ।

संघले यस्तो निर्णय संविधानले प्रत्याभूत गरेको न्याय तथा सम्पत्तिको हकको मर्मविपरीत हुनुका साथै धितोपत्रसम्बन्धी ऐन, २०६३ को भावनासमेत प्रतिकूल रहेको जनाएको छ।

नेपाल धितोपत्र बोर्डले समस्या समाधान गर्न प्रभावकारी भूमिका खेल्न नसकेको भन्दै संघले आलोचना गरेको छ। बजारलाई सुरक्षित रूपमा सञ्चालन गराउनु नियामकको मुख्य दायित्व भएको भन्दै कारोबार नै रोक्दा लगानीकर्ताको विश्वासमा असर पर्ने संघको भनाइ छ।

संघले बेनी सेक्युरिटिजका ग्राहकको कारोबार तत्काल सुचारु गर्न वा वैकल्पिक कारोबारको व्यवस्था मिलाउन माग गरेको छ। साथै, गल्ती गर्ने ब्रोकर तथा पदाधिकारीमाथि मात्र स्वतन्त्र अनुसन्धान गरी कडा कारबाही गर्न आग्रह गरेको छ।

निलम्बन अवधिमा ग्राहकको रकम र सेयरको सुरक्षाबारे नेप्से तथा सीडीएससीले तत्काल आधिकारिक जानकारी सार्वजनिक गर्नुपर्ने संघको माग छ। भविष्यमा यस्ता समस्या दोहोरिन नदिन ग्राहक खाता छुट्टै राख्ने व्यवस्था, तत्काल ब्रोकर स्थानान्तरण संयन्त्र र क्षतिपूर्ति कोषको प्रभावकारी परिचालन गर्नसमेत संघले माग गरेको छ।

कारोबार रोकेर लगानीकर्ता र बजारको विश्वासमा असर पार्ने कार्यले समग्र पुँजी बजारप्रतिको भरोसा नै संकटमा पर्न सक्ने चेतावनी संघले दिएको छ।

Originally published on abcnews.com.np.