मुम्बई । बलिउड अभिनेता गोविन्दा र उनकी पत्नी सुनिता आहुजाबीचको सम्बन्धविच्छेद विवादले नयाँ मोड लिएको छ । सुनिताले गोविन्दाविरुद्ध दायर गरेको सम्बन्धविच्छेदको मुद्दा फिर्ता लिएकी छन् ।

गोविन्दाका म्यानेजर शशी सिन्हाले सुनिताले मुद्दा फिर्ता लिएको पुष्टि गरेका छन् । बुधबार, १९ अगस्ट २०२६ मा सुनिता छोरा यशवद्र्धन आहुजासहित मुम्बईको बान्द्रा परिवार अदालत पुगेकी थिइन् । अदालत पुग्नुको कारणबारे पपाराजीले सोध्दा उनले ठट्टा गर्दै आफू ‘जन्मदिन मनाउन’ आएको बताएकी थिइन् ।

यसपछि शशी सिन्हाले हिन्दुस्तान टाइम्ससँग कुरा गर्दै सुनिताले मुद्दा फिर्ता लिइसकेको र अहिले दम्पतीबीचको अवस्था सामान्य रहेको बताएका छन् ।

“सुनिताजीले आफ्नो मुद्दा फिर्ता लिइसक्नुभएको छ । यो खुसीको कुरा हो । उनी धेरै रिसाएको देखिएकाले सबैलाई समस्या भएको जस्तो लागेको हुन सक्छ, तर अहिले दुवैबीच सबै ठीक छ,” उनले भनेका छन् ।

२०२४ मा दायर भएको थियो मुद्दा

रिपोर्टअनुसार सुनिताले ५ डिसेम्बर २०२४ मा बान्द्रा परिवार अदालतमा हिन्दू म्यारिज एक्ट, १९५५ अन्तर्गत सम्बन्धविच्छेदको याचिका दायर गरेकी थिइन् । उनले गोविन्दामाथि व्यभिचार, क्रुरता र परित्यागको आरोप लगाएको बताइएको छ ।

गोविन्दा र सुनिताको विवाह सन् १९८७ मा भएको हो । उनीहरूका दुई सन्तान छन्—छोरी टीना आहुजा र छोरा यशवद्र्धन आहुजा ।

पछिल्लो समय दम्पतीबीचको मनमुटाव सार्वजनिक रूपमा समेत देखिन थालेको थियो । सुनिताले केही दिनअघि गोविन्दालाई ‘सुगर ड्याडी’ भन्दै टिप्पणी गरेकी थिइन् ।

अभिनेत्रीसम्बन्धी चर्चाले विवाद बढाएको थियो

गोविन्दा आफ्नी आगामी फिल्मकी सहकलाकार कोमल रानी स्वर्णकरसँग सम्बन्धमा रहेको चर्चा चलेपछि पनि सुनिताले सार्वजनिक रूपमा असन्तुष्टि व्यक्त गरेकी थिइन् ।

गोविन्दा र कोमललाई एकसाथ विमानस्थलमा देखिएपछि सुनिताले पपाराजीसँग कुराकानी गर्दै गोविन्दामाथि टिप्पणी गरेकी थिइन् । त्यसपछि गोविन्दाले पनि सुनितालाई सार्वजनिक रूपमा मनपरी नबोल्न चेतावनी दिएको बताइएको छ ।

यस घटनापछि उनीहरूबीचको विवाद थप चर्किएको थियो । तर, सुनिताले सम्बन्धविच्छेदको मुद्दा फिर्ता लिएपछि अहिले वैवाहिक सम्बन्ध सुधारतर्फ गएको दाबी गोविन्दाका म्यानेजरले गरेका छन् ।

म्यानेजर सिन्हाले पारिवारिक विषयलाई परिवारभित्रै राख्नुपर्ने भन्दै विवाद सार्वजनिक भएकोमा दुःखसमेत व्यक्त गरेका छन् ।

Originally published on abcnews.com.np.