सुर्खेत । कर्णाली प्रदेशका प्रमुख यज्ञराज जोशीले कर्णालीप्रतिको राज्यको परम्परागत बुझाइ र दृष्टिकोण बदल्नुपर्ने बताएका छन्। कर्णालीलाई सधैँ अभाव, पछौटेपन र समस्याको थलोका रूपमा हेर्ने प्रवृत्ति अन्त्य गरी विकास र समृद्धिको प्राथमिकतामा राख्नुपर्ने उनको भनाइ छ।

कर्णाली प्रदेश स्थापना दिवसका अवसरमा बिहीबार आयोजित समारोहलाई सम्बोधन गर्दै प्रदेश प्रमुख जोशीले सोचमा परिवर्तन नआएसम्म कर्णालीको विकासको मानक माथि उठ्न नसक्ने बताए। पर्याप्त सम्भावना हुँदाहुँदै पनि राज्यको हेपाहा प्रवृत्तिका कारण कर्णाली पछाडि परेको उनको भनाइ थियो।

कर्णालीलाई समस्याको ‘खाल्डो’का रूपमा मात्र हेर्ने दृष्टिकोणले प्रदेशको वास्तविक सम्भावना ओझेलमा परेको भन्दै उनले ‘तेरो र मेरो’ भन्ने भावनाबाट माथि उठेर कर्णालीको समृद्धिका लागि सबै एकजुट हुनुपर्नेमा जोड दिए।

प्राकृतिक स्रोतको उपयोगमा जोड

प्रदेश प्रमुख जोशीले कर्णालीको समृद्धिका लागि प्राकृतिक स्रोतको उपयोगलाई राज्यले प्राथमिकतामा राख्नुपर्ने बताए। विशेषगरी दैलेखमा पेट्रोलियम पदार्थ तथा प्राकृतिक ग्यासको सम्भावना पुष्टि भइसकेकाले यसको उत्खननमा संघीय सरकारले गम्भीरतापूर्वक काम गर्नुपर्ने उनको भनाइ छ।

“कर्णालीमा ग्यास छ, पेट्रोल छ। दैलेखमा देशलाई समृद्धिको बाटोमा लैजाने ग्यास छ भन्ने पुष्टि भइसकेको छ,” उनले भने, “तर हामी त्यसको उत्खनन गर्नुको साटो ग्यासको लाइनमा बसेका छौँ। यसको उत्खननमा राज्य गम्भीर बन्नुपर्छ।”

पछिल्ला दुई वर्षदेखि थप उत्खननको काम रोकिएको भन्दै जोशीले त्यसलाई तत्काल अघि बढाउन संघीय सरकार जिम्मेवार बन्नुपर्ने बताए।

उत्खनन तत्काल अघि बढाउन आग्रह

मुलुकमा पछिल्लो समय देखिएको ग्यास अभावबाट समेत पाठ सिक्दै कर्णालीमा रहेका प्राकृतिक स्रोतको उपयोगमा राज्यले प्राथमिकता दिनुपर्ने उनको भनाइ छ।

प्रदेश प्रमुख जोशीले दैलेखमा रहेको प्राकृतिक ग्यास तथा पेट्रोलियम पदार्थको उत्खनन कार्य तत्काल अघि बढाउन संघीय सरकारलाई आग्रह गरे। कर्णालीमा उपलब्ध प्राकृतिक स्रोतको उचित उपयोग गर्न सके देशलाई ऊर्जा तथा आर्थिक रूपमा आत्मनिर्भर बनाउन महत्वपूर्ण योगदान पुग्ने उनले बताए।

Originally published on abcnews.com.np.