काठमाडौं । एक्स्ट्रिम इनर्जी ड्रिङ्क्सले नेपाली राष्ट्रिय क्रिकेट टोली र नेपाल ‘ए’ टोलीको जर्सीमा आर्म स्पोन्सरका रूपमा सम्झौता गरेको छ।

नेपाल क्रिकेट संघ (क्यान)का अनुसार एक्स्ट्रिमले राष्ट्रिय टोलीले खेल्ने एसीसी प्रिमियर कप र नेपाल ‘ए’ले खेल्ने टप एन्ड टी–२० क्रिकेट प्रतियोगिताका लागि जर्सीको काँधमा आफ्नो लोगो राख्ने गरी प्रायोजन गरेको हो।

प्रायोजन रकम भने सार्वजनिक गरिएको छैन।

सन्दीप लामिछानेको कप्तानीमा रहेको नेपाली राष्ट्रिय टोली अहिले एसीसी प्रिमियर कपको तयारीमा भारतमा अभ्यास गरिरहेको छ। टोलीले भारतमा १० दिन अभ्यास गरेपछि त्यहीँबाट मलेसिया प्रस्थान गर्नेछ।

एसीसी प्रिमियर कपमा नेपाल समूह ‘ए’मा रहेको छ। नेपालको समूहमा बहराइन, हङकङ, आयोजक मलेसिया र साउदी अरेबिया छन्। समूह ‘बी’मा यूएई, ओमान, कुवेत, कतार र सिंगापुर रहेका छन्। एकदिवसीय फर्म्याटमा हुने प्रतियोगिताको विजेताले आगामी वर्ष हुने एसिया कपमा स्थान बनाउने अवसर पाउनेछ।

यस्तै, अनिल शाहको कप्तानीमा रहेको नेपाल ‘ए’ टोली अस्ट्रेलियाको नर्थन टेरिटोरीमा हुने टप एन्ड टी–२० सिरिजमा सहभागी हुँदैछ। अगस्ट २१ देखि ३० सम्म हुने प्रतियोगितामा नेपाल ‘ए’ले एनटी स्ट्राइक, बंगलादेश हाई–परफर्मेन्स, होबार्ट हरिकेन्स, एसीटी कोमेट्स, किङ्समेन र भिक्टोरियासँग लिग चरणका खेल खेल्नेछ।

राष्ट्रिय टोली र नेपाल ‘ए’ दुवै टोलीलाई एकैपटक प्रायोजन प्राप्त हुनुले नेपाली क्रिकेटको व्यावसायिक विकासमा समेत सहयोग पुग्ने अपेक्षा गरिएको छ।

Originally published on abcnews.com.np.