भदौ २ गते बिहान करिब ७ बजे भागरकी हेमकुमारी आले घरनजिकै रहेको शंखदेवी सामुदायिक वनमा च्याउ टिप्न गएकी थिइन्। घर फर्किएपछि उनका नाति साढे दुई वर्षीय शिवान तामाङ घरमा नभएको थाहा भएको थियो।

स्थानीय बासिन्दा तथा आफन्तले वन क्षेत्रमा खोजी गरे पनि बालक नभेटिएपछि प्रहरीलाई खबर गरिएको थियो। त्यसपछि इलाका प्रहरी कार्यालय गैँडाकोट, इलाका प्रहरी कार्यालय रजहर र अस्थायी प्रहरी पोस्ट बेल्डियाबाट प्रहरी टोली परिचालन गरी स्थानीयवासीको सहयोगमा खोजी तीव्र पारिएको थियो।

दुई दिनसम्म गरिएको खोजीपछि भदौ ४ गते बिहान करिब १० बजे बालकलाई गैँडाकोट–१४ स्थित शंखदेवी सामुदायिक वनअन्तर्गत भागर खोलाको सिरानमा फेला पारिएको प्रहरीले जनाएको छ।

सकुशल उद्धार गरिएका बालकलाई आवश्यक प्रक्रिया पूरा गरी आफन्तको जिम्मा लगाइएको छ। बालक घरबाट कसरी सामुदायिक वनको उक्त स्थानसम्म पुगे भन्नेबारे भने खुल्न सकेको छैन।

प्रहरी र स्थानीयवासीको निरन्तर प्रयासपछि बालक सकुशल फेला परेपछि परिवारले राहत महसुस गरेका छन्।