हेटौँडा । नेकपा एमालेका किरण थापामगर बागमती प्रदेशको सातौँ मुख्यमन्त्री नियुक्त भएका छन्। १०४ सदस्यीय प्रदेशसभामा नेकपा, एमाले र राष्ट्रिय प्रजातन्त्र पार्टी (राप्रपा)का ६३ सांसदको समर्थनमा थापामगर मुख्यमन्त्री बनेका हुन्।

प्रदेश प्रमुख दीपकप्रसाद देवकोटाले बिहीबार (भदौ ४) नेपालको संविधानको धारा १६८ को उपधारा (२) बमोजिम थापामगरलाई मुख्यमन्त्री नियुक्त गरेका हुन्।

यसअघि उनी बागमती प्रदेश सरकारमा दुईपटक स्वास्थ्य मन्त्रालयको जिम्मेवारी सम्हालिसकेका थिए।

थापामगरभन्दा अघि डोरमणि पौडेल, अष्टलक्ष्मी शाक्य, राजेन्द्रप्रसाद पाण्डे, शालिकराम जम्कट्टेल, बहादुरसिंह लामा र इन्द्रबहादुर बानियाँ बागमती प्रदेशको मुख्यमन्त्री बनिसकेका छन्।

सामाजिक सेवाबाट राजनीतिमा

भक्तपुरका थापामगरको राजनीतिक यात्रा सामाजिक सेवाबाट सुरु भएको हो। आईए तहसम्म अध्ययन गरेका उनी एमाले भक्तपुर जिल्ला कमिटी सदस्य हुँदै उपाध्यक्षको जिम्मेवारीसम्म पुगेका छन्।

वि.सं. २०७४ मा सूर्यविनायक नगरपालिका–८ को वडाध्यक्षमा निर्वाचित थापामगरले नगरपालिकाको सामाजिक विकास समितिको संयोजकको जिम्मेवारीसमेत सम्हालेका थिए।

वि.सं. २०७९ मा भक्तपुर निर्वाचन क्षेत्र नम्बर २ को प्रदेशसभा (१) बाट निर्वाचित भएपछि उनी प्रदेश राजनीतिमा प्रवेश गरेका हुन्।

दुईपटक स्वास्थ्य मन्त्री

थापामगरले वि.सं. २०८१ साउन ९ देखि २०८३ असारसम्म बागमती प्रदेशको स्वास्थ्य मन्त्रीका रूपमा दुईपटक जिम्मेवारी सम्हालेका थिए।

राजनीतिसँगै सामाजिक तथा खेलकुद क्षेत्रमा पनि उनको सक्रियता रहेको छ। उनले केदारनाथको शिर डोलेश्वर महादेव मन्दिर संरक्षण समितिको सचिव, उपाध्यक्ष हुँदै कार्यवाहक अध्यक्षको जिम्मेवारी सम्हालेका छन्।

त्यस्तै, नेपाल रेडक्रस सोसाइटी सिपाडोल उपशाखाको सभापति तीन कार्यकाल र भक्तपुर शाखाको उपसभापति दुई कार्यकाल सम्हालेका थापामगर नेपाल तेक्वान्दो संघ बागमती प्रदेशका कोषाध्यक्षसमेत भएका थिए।

सूर्यविनायक उद्योग वाणिज्य संघको अध्यक्ष तथा विभिन्न खेलकुद र युवा क्लबमा संरक्षकको भूमिकामा समेत उनी सक्रिय रहँदै आएका छन्।

Originally published on abcnews.com.np.