पोखरा । धौवादी फलाम कम्पनी लिमिटेडले नवलपुरको हुप्सेकोट गाउँपालिका–५, धौवादीमा रहेको फलाम खानीबाट ९ करोड ६० लाख धाउ फलाम उत्खनन गर्ने योजना अघि सारेको छ।

करिब ४१ वर्ग किलोमिटर क्षेत्रमा फैलिएको खानीबाट फलाम उत्खनन गर्ने योजनासहित कम्पनीले खानी तथा भूगर्भ विभागमा प्रतिवेदन बुझाएको हो। खानी क्षेत्रलाई धौवादी पोखरी ब्लक र दुर्लुङ ब्लक गरी दुई भागमा विभाजन गरिएको छ। पोखरी ब्लक २५ वर्ग किलोमिटर र दुर्लुङ ब्लक १६ वर्ग किलोमिटर क्षेत्रमा फैलिएको छ।

कम्पनीले योजना स्वीकृत भएपछि फलामको भण्डारबारे थप अध्ययन तथा उत्खननको काम अघि बढाउने जनाएको छ।

१ हजार ५०० मिटर ड्रिलिङ

नेपालमा फलामको व्यावसायिक उत्पादन गर्ने उद्देश्यले स्थापना गरिएको धौवादी फलाम कम्पनीले खानी क्षेत्रमा परीक्षणका लागि विभिन्न १२ स्थानमा ड्रिलिङ गरेको छ।

कम्पनीका निर्देशक शैलेशकुमार थापाका अनुसार जमिनमुनिको फलामको नमुना परीक्षणका लागि हालसम्म १ हजार ५०० मिटर ड्रिलिङ सम्पन्न भएको छ।

आयात प्रतिस्थापन र रोजगारीको अपेक्षा

हाल खानीको वातावरणीय प्रभाव मूल्यांकनको काम भइरहेको कम्पनीले जनाएको छ। विस्तृत परियोजना प्रतिवेदन (डीपीआर) तयार गर्ने प्रक्रिया पनि छिट्टै सुरु गरिने बताइएको छ।

खानी सञ्चालनमा आएपछि यहाँबाट उत्पादित फलामजन्य वस्तुले नेपालको समग्र मागको करिब २५ प्रतिशतसम्म आयात प्रतिस्थापन गर्न सक्ने अपेक्षा गरिएको निर्देशक थापाले बताए। खानी सञ्चालनबाट ठूलो संख्यामा रोजगारी सिर्जना हुनुका साथै राष्ट्रिय अर्थतन्त्रमा समेत योगदान पुग्ने उनको भनाइ छ।

पूर्वाधार निर्माण तीव्र

कम्पनीका अनुसार खानीसम्म पहुँचका लागि आवश्यक पूर्वाधार निर्माण तथा सडक स्तरोन्नतिको काम भइरहेको छ। खानी सञ्चालनका लागि आवश्यक अन्य पूर्वाधार विकासलाई पनि योजनाअनुसार अघि बढाइने कम्पनीले जनाएको छ।

Originally published on abcnews.com.np.