काठमाडौं । पश्चिम एसियामा जारी तनावबीच अमेरिकाले आफ्नो यूएसएस जर्ज वाशिंगटन एयरक्राफ्ट क्यारियर उक्त क्षेत्रमा तैनाथ गरेको छ। अमेरिकी सेनका अनुसार जर्ज वाशिंगटनले लामो समयदेखि पश्चिम एसियामा तैनाथ यूएसएस अब्राहम लिंकनको स्थान लिनेछ।

पश्चिम एसियामा अमेरिकी सैन्य अभियानको जिम्मेवारी सम्हाल्दै आएको अमेरिकी सेन्ट्रल कमान्डले यूएसएस जर्ज वाशिंगटन बुधबार उक्त क्षेत्रमा पुगेको जनाएको छ।

यसैबीच, यूएसएस अब्राहम लिंकन अमेरिका कहिले फर्किने भन्नेबारे भने अमेरिकी सेनाले स्पष्ट जानकारी दिएको छैन। फर्किने क्रममा जहाज कुनै बन्दरगाहमा रोकिने वा नरोकिने विषयसमेत स्पष्ट छैन। पश्चिम एसियाबाट अमेरिकासम्मको यात्रामा एक महिनाभन्दा बढी समय लाग्न सक्ने बताइएको छ।

यूएसएस अब्राहम लिंकनको लामो तैनाथीलाई लिएर पछिल्लो समय प्रश्न उठ्दै आएका थिए। जहाजले २५० दिनभन्दा बढी समय लगातार समुद्रमा रहेर नयाँ रेकर्ड बनाएको थियो।

लामो समय समुद्रमा रहँदा चालक दलमा तनाव तथा मानसिक स्वास्थ्यसम्बन्धी समस्या देखिएको र खानेकुरा, पेय पदार्थ तथा सरसफाइका अत्यावश्यक सामग्रीको अभाव भएको रिपोर्ट सार्वजनिक भएका थिए। अमेरिकाका केही डेमोक्रेटिक सांसदहरूले जहाजमा देखिएको अवस्थाबारे रक्षा मन्त्रालयसँग जवाफसमेत मागेका छन्।

रक्षा मन्त्रीले रिपोर्ट अस्वीकार गरे

अमेरिकी रक्षा मन्त्री पिट हेगसेथले भने अब्राहम लिंकनको अवस्थाबारे सार्वजनिक भएका रिपोर्ट अस्वीकार गर्दै घटनालाई पूर्ण रूपमा गलत ढंगले प्रस्तुत गरिएको बताएका छन्।

उनले गत साता यूएसएस अब्राहम लिंकनका चालक दलसँग कुराकानी गरेका थिए। त्यसपछि अमेरिकी सेन्ट्रल कमान्डका प्रमुख एडमिरल ब्राड कूपरले गत सप्ताहान्तमा जहाजको भ्रमण गरेका थिए।

कूपरले चालक दलको प्रदर्शनको प्रशंसा गर्दै उनीहरूले ऐतिहासिक प्रदर्शन गरेको र अब घर फर्किने समय आएको बताएका छन्।

यूएसएस जर्ज वाशिंगटनको तैनाथीले पश्चिम एसियामा अमेरिकी सैन्य उपस्थितिलाई निरन्तरता दिएको छ भने लामो समयदेखि समुद्रमा रहेको अब्राहम लिंकनको तैनाथी अन्त्य हुने भएको छ।

Originally published on abcnews.com.np.