हेटौँडा । बागमती प्रदेशका नवनियुक्त मुख्यमन्त्री किरण थापा मगरले पद तथा गोपनीयताको शपथ ग्रहण गरेका छन्।

हेटौँडास्थित प्रदेश प्रमुखको कार्यालयमा आज आयोजित समारोहमा प्रदेश प्रमुख दीपकप्रसाद देवकोटाले मुख्यमन्त्री थापा मगरलाई पद तथा गोपनीयताको शपथ गराएका हुन्।

नेपालको संविधानको धारा १६८ को उपधारा (२) बमोजिम थापा मगर मुख्यमन्त्री नियुक्त भएका हुन्। उनलाई नेपाल कम्युनिष्ट पार्टी (एमाले), नेपाली कम्युनिष्ट पार्टी (नेकपा) र राष्ट्रिय प्रजातन्त्र पार्टी (राप्रपा)को समर्थन रहेको छ।

मुख्यमन्त्री थापा मगरले प्रदेशसभाका कुल ६३ सदस्यको समर्थन प्राप्त गरेका छन्। समर्थन गर्नेमा एमालेका २५, नेकपाका २६ र राप्रपाका १२ जना प्रदेशसभा सदस्य रहेका छन्।

तीन दलको समर्थनमा बहुमत जुटाएपछि थापा मगर बागमती प्रदेशको मुख्यमन्त्री नियुक्त भएका हुन्। अब उनले मन्त्रिपरिषद् विस्तार तथा प्रदेश सरकारको आगामी कार्यदिशा तय गर्ने तयारी गर्नेछन्।

Originally published on abcnews.com.np.